ԱՍԿԱՐՅԱՆԸ ՆՎԱՃՈՒՄ Է ԱՇԽԱՐՀԸ Հունվարի 21-23-ն ԱՄՆ-ի ամենահեղինակավոր ֆիլմադարաններից մեկը՝ «Հարվարդ ֆիլմ արխիվը» անցկացնում է ռեժիսոր Դոն Ասկարյանի ֆիլմերի հետահայաց ցուցադրում։ «Ռեժիսորը ֆոկուսի մեջ» ծրագրով կցուցադրվեն նրա «Կոմիտաս», «Ավետիք» ֆիլմերը եւ ռեժիսորի «Հին հռովմեական ճանապարհին» վերջին աշխատանքը, որը մեծ հաջողությամբ ցուցադրվել է միջազգային մի շարք կինոփառատոներում։ 2001 թվականի հոկտեմբերին հետահայաց համանման ցուցադրումներ են եղել ԱՄՆ-ում՝ Սարասոտայի համաշխարհային կինոփառատոնում եւ Հռոմի Ազիատիկամեդիալե փառատոնում։ Ահա թե ինչ է գրում իր ծրագրում «Հարվարդ ֆիլմ արխիվը» Դոն Ասկարյանի մասին. «Դոն Ասկարյանը ամենանշանավոր հայ ռեժիսորն է Սերգեյ Փարաջանովի ժամանակներից ի վեր, ստեղծում է ֆիլմեր, որոնք հետազոտում են իր հայրենի երկրի պատմությունն ու ոգին։ Նա այդ անում է ժամանակակից իդիոմների օգնությամբ, որ ներառում են սյուրռեալիստական հնչերանգներ եւ հզոր կերպարներ, որոնք քննադատները հաճախ բնորոշում են իբրեւ մոգական ռեալիզմ-իրապաշտություն, որ ընդգրկում է գեղեցկության եւ բրուտայնության ծայրահեղությունները։ Ծնված լինելով 1949 թվականին Լեռնային Ղարաբաղում, Դոն Ասկարյանը պատմություն եւ արվեստ է ուսումնասիրել Մոսկվայում, որտեղ աշխատել է ռեժիսորի եւ կինոքննադատի ասիստենտ՝ ընդհուպ մինչեւ իր բանտարկությունը՝ 1975 թվականը։ 1978թ. տարագրվելով Արեւմտյան Բեռլին՝ Ասկարյանը սկսում է ստեղծել իր մեդիտացիաները Հայաստանի մասին՝ սկսելով Չեխովի «Արջի» էկրանավորումից։ Այդ ժամանակվանից սկսած նա նկարահանել է փաստագրական, կենսագրական էսսեներից մինչեւ գեղարվեստական մի շարք ֆիլմեր, որոնք աշխարհով մեկ պարգեւների եւ ճանաչման են արժանացել փառատոներում։ ՆՈՒՆԵ ՀՈՎՀԱՆՆԻՍՅԱՆ
