ՍՏԱՑՎԵԼ ԷԻՆ ՊԱՏԱՍԽԱՆՆԵՐԸ «Հոկտեմբերի 27» քրգործի դատաքննությանը մինչեւ ամբաստանյալ Էդիկ Գրիգորյանի դատաքննական ցուցմունքներ տալը, նախաքննող դատավոր Սամվել Ուզունյանը տեղեկացրեց, որ ստացվել են պաշտպանների միջնորդությունների կապակցությամբ պատասխաններ։ Առաջին պատասխանը ամբաստանյալ Ն. Հունանյանի 4 դիմումներն էին, որոնցից մեկն ուղղված է եղել ԶԴ քննչական խմբի պետ Արտակ Հարությունյանին, մեկը՝ զինվորական դատախազին եւ Զեյթուն եւ Քանաքեռ համայնքների առաջին ատյանի դատարանի նախագահին, Մարդու իրավունքների հանձնաժողովի նախագահին, ինչպես նաեւ գլխավոր դատախազին։ Ըստ վերոնշյալ դիմումների, Ն. Հունանյանն ասել էր, որ իրեն տրամադրվել է գործի նյութերից մի քանի հատոր եւ պահանջել էր, որ բոլոր հատորները միաժամանակ տրվեն։ Խոսք էր գնացել նաեւ գրագրության ցածր կուլտուրայի մասին։ Դատարանը ստացել էր նաեւ պաշտպանության փոխնախարար Մ. Գրիգորյանի պատասխանը, ըստ որի նա հայտնել էր, որ ամբաստանյալ Դերենիկ Բեջանովը ՊՆ սոցիալական վարչությունում եւ երկրապահում հաշվառված չի եղել որպես մարտական գործողությունների մասնակից։ Ռ. Մ.
