ՀԻՆ ՈՒ ՆՈՐ ՓՈՂՈՑՆԵՐ 2002թ. մարտի սկզբին կբացվի Գրիգոր Լուսավորիչ պողոտայից դեպի Շահումյան հրապարակ ձգվող, Վազգեն Սարգսյան փողոցին զուգահեռ կառուցվող փողոցը։ Ըստ Երեւանի գլխավոր ճարտարապետ Նարեկ Սարգսյանի. «Պետք է ամբողջապես ավարտվի երկու շենքերի՝ իտալական դեսպանատան եւ հյուրանոցի կառուցումը, որպեսզի ամբողջ համալիրը միասնականորեն բացվի»։ Պրն Սարգսյանից փորձեցինք ճշտել նաեւ՝ արդյոք նախատեսվո՞ւմ է որեւէ միջոցներ ձեռնարկել Երվանդ Քոչար փողոցի՝ ՊՀԽ-ից մինչեւ ոսկու շուկա ընկած հատվածը բարվոք տեսքի բերելու համար (այդ տարածքում մայթերի գրեթե չգոյությունը լուրջ հարցականի տակ է դնում բազմաթիվ հետիոտների անվտանգությունը)։ Պատասխանը հետեւյալն էր. «Իրոք, այդ խնդիրը հրատապ է եւ մեզ անհանգստացնում է։ Տարիների ընթացքում է այդ վիճակն առաջացել։ Անմիջապես փողոցի ետեւի տարածքում, մինչեւ Գր. Լուսավորիչ եկեղեցին ձգվող տարածքում հին բնակելի ֆոնդն է։ Վերջինիս հետ կապված «Երեւաննախագիծ» ինստիտուտը ծրագիր է մշակում։ Այդ փողոցի ավտոկայանատեղերի եւ մայթերի խնդիրը ծրագրում դրված է։ Ամենայն հավանականությամբ, քաղաքի այդ տարածքի խնդիրը մինչեւ 2003 թվականի վերջը կլուծվի։ Դա մոտ երկու տարվա ծրագրային խնդիր է»։ Սեփ. լր.
