«ԱՇՏԱՐԱԿ-ԿԱԹԸ» ԱՊԱՑՈՒՑՈՒՄ Է «Առավոտի» 15.12.2001թ. համարում տպագրված «Աշտարակ-Կաթը» զարմացնում է» նյութը ֆիրմայի կողմից կազմակերպած խաղարկության վերաբերյալ էր։ Մրցույթի ընթացքում խաղարկվել են ուղեգրեր Կիպրոս, համակարգիչ, բջջային հեռախոս։ Ինչպես նյութի հեղինակ «Աշտարակ-Կաթի» սպառողն էր նշել, մրցույթը հետաձգվել էր մեկ ամսով եւ պետք է անցկացվեր նոյեմբերի սկզբներին, սակայն սպառողն այդպես էլ չէր իմացել խաղարկության ժամկետը եւ գրել էր, որ այն տեղի չի ունեցել։ Վերը նշված հրապարակման առիթով «Առավոտին» արձագանքեցին «Աշտարակ-Կաթ» ընկերությունից եւ ի առարկումն հիշյալ նյութի, անցկացված խաղարկության վերաբերյալ տրամադրեցին ապացուցող փաստերն ու փաստաթղթերը։ Ըստ դրանց, սույն թվականի նոյեմբերի 3-ին «Արմենիա TV» հեռուստաընկերության ուղիղ եթերով կատարվել է խաղարկությունը, որի ընթացքում հարցաթերթիկներում նշված բոլոր շահումները խաղարկվել են եւ մեկ ամսվա ընթացքում շահողները ստացել են իրենց մրցանակները։ Ինչ վերաբերում է խաղարկության օրվա հետաձգմանը, ընկերությունից հայտնեցին, որ հետաձգվել է ոչ թե խաղարկության օրը, այլ խաղարկվող հարցաթերթիկների ընդունման ժամկետը, այն էլ բազմաթիվ սպառողների խնդրանքով։ Իսկ կայանալիք մրցույթի օրվա մասին նախօրոք հայտնվել է «Ռուսսկոյե ռադիո» եւ «Hit FM» ռադիոկայաններով՝ օրը 5 անգամ եւ «Արմենիա TV» հեռուստաընկերության «Ինչպես ես, բարեկամ» ծրագրով։ Իսկ ընկերությունից նեղացած սպառողին «Աշտարակ-Կաթը» բարեկամաբար խորհուրդ տվեց այցելել ընկերության գրասենյակ եւ սեփական աչքերով տեսնել ու համոզվել, ստուգել իր մոտ եղած կտրոնի համարը, ինչպես նաեւ՝ ով գնաց Կիպրոս, ով թանկարժեք իրերի տեր դարձավ։ Սեփ. լր.
