ՉԽԱՆԳԱՐԵՑ ԱՃԱՊԱՐՈՒՄԸ «Հավաքական անվտանգության մասին» պայմանագրի մասնակից պետությունների հավաքական անվտանգության համակարգի ուժերի միջոցների կազմավորման եւ գործունեության կարգի մասին արձանագրության գործող սահմանադրությանը համապատասխանելու հարցն էր դրված երեկվա ՍԴ նիստի օրակարգում։ ՀՀ նախագահի ներկայացուցիչն էր պաշտպանության նախարար Սերժ Սարգսյանը, որն իր փաստարկները ներկայացնելուց հետո այնքան էր շտապում, որ չնկատեց ոչ միայն իր ետեւից վազող լրագրողներին, այլեւ չմնաց, որպեսզի խորհրդակցական սենյակից դուրս եկած դատավորների որոշումը լսեր (հավանաբար վստահ էր ելքով)։ Արձանագրությամբ նախատեսվում է կազմավորել հավաքական անվտանգության ուժերի արեւելաեվրոպական, կովկասյան, կենտրոնասիական տարածաշրջանների զորախմբավորումներ, որոնց վրա է դրվում հնարավոր ագրեսիայի կանխման, հետմղման, պայմանագրի մասնակից պետությունների ինքնիշխանության եւ տարածքային ամբողջականության պաշտպանության խնդիրը (արձանագրությունը ստորագրել են Բելառուսը, Ղազախստանը, Ղրղըզստանը, Ռուսաստանն ու Տաջիկստանը)։ Տեղեկացնենք, որ այդ զինուժերի եւ «միջոցների կազմում» ըստ հոդված 1-ի, նախատեսվում է կոալիցիոն խմբավորումների համար կառավարման մարմիններ։ Իսկ որ ուշագրավ է, մասնակից պետությունները ստանձնել են նաեւ զորքերի տարածաշրջանային խմբավորման հրամանատարության կազմավորման, ֆինանսավորման եւ գործունեության կազմակերպման կարգը։ Ռ. Մ.
