Ո՞ՒՐ ԵՆ ՏԱՆՈՒՄ ՊԱՀԱԾՈՆԵՐԻ ՀԵՏՔԵՐԸ Վանաձորի առեւտրի կետերում 12 ամիս ի վեր վաճառվող մարդասիրական օգնության իտալական տավարի մսի պահածոների մասին («Իտալիայի կառավարության եւ ժողովրդի նվերը» անգլերեն եւ իտալերեն մակագրությամբ) ահազանգել է քանիցս ոչ միայն «Առավոտը», այլեւ՝ «Մամուլն ընդդեմ կոռուպցիայի» տեղեկագիրը՝ թիվ 8 համարում։ Այդ առթիվ հրապարակումներին պարբերաբար անդրադարձել է նաեւ «Վանաձորի կյանք» ռադիոն՝ հարցին հասարակական առավել մեծ հնչեղություն տալու նպատակով։ Այդուհանդերձ, մարդասիրական օգնության վաճառքը շարունակվում է փողոցային առեւտրի մի քանի կետերում (ի դեպ, սկզբում այն վաճառվում էր նաեւ խանութներում)։ Առայսօր պաշտոնական որեւէ պարզաբանում չի եղել, թե որտեղի՞ց է գալիս այդ օգնությունը, ո՞ւմ է հասցեագրվել եւ ո՞ր իրավունքով է պարբերաբար ստացվող (յուրաքանչյուր խմբաքանակի իրացումից հետո) այդ օգնությունը վաճառվում։ Ի դեպ, օգնության վաճառքի վերաբերյալ կա 2 վարկած։ Մեկն այն է, որ «ՏտՑՏՉՌՍ»-ներն այն ձեռք են բերում մայրաքաղաքի ինչ-որ բազայից, երկրորդը՝ այն, որ օգնությունը հասցեագրվել է Վանաձորի ինչ-որ հիմնարկների, որոնք էլ այն նպատակահարմար են գտել վաճառել (միգուցե որպես ամիսներ շարունակ չտրվող աշխատավարձի փոխհատուցում)։ Վերջերս պատահաբար պարզեցինք, որ այդ «օգնությունը» վաճառվում է նաեւ մայրաքաղաքում։ Մասնավորապես՝ Կասյան 2 հասցեում գտնվող բնակելի շենքի 1-ին հարկում տեղակայված մթերային առեւտրի կետերից մեկում։ Անշուշտ, այդ առեւտրի կետը օգնությունը վաճառող եզակի կետը չի կարող լինել, եւ, հնարավոր են «բացահայտումներ» նաեւ առեւտրի այլ կետերում։ ԳԱՅԱՆԵ ՀՈՎՍԵՓՅԱՆ
