Հետեւանքներով լի մի բենզալցակայան Պատկերվածը Լենինգրադյան փողոցում, «Սեբաստիա» հյուրանոցի առջեւ կառուցվող բենզալցակայանի հետեւանքներն են։ Այս փոքրիկ կանաչ հատվածի մայթին հարող մասը եւ ավելի խորը՝ ծառերի արմատները փորված-քանդված են։ Մետաղյա սյուները կանգնեցված են, 30 եւ ավելի տարվա ծառերի արմատները՝ մերկացված-քանդված։ Կասկած չկա, որ բենզալցակայանի լրիվ կառուցապատման համար տերերը կհեռացնեն-կկտրեն որոշ ծառեր։ Երեւանը մինչեւ կոկորդ լի է բենզալցակայաններով եւ այսօր էլ ավելանում է դրանց թիվը։ Այս լցակայանի կառուցապատման թույլտվությունը, ըստ մեր տվյալների, տվել է Երեւանի նախկին քաղաքապետը։ Սակայն սա չի նշանակում, թե այդ բենզալցակայանի գոյությունը եւ կառուցապատման փաստաթղթային օրինականությունը լրիվ արդարացված են՝ այն էլ իրականացման նմանօրինակ ձեւերով։ Այսպես սուսիկ-փուսիկ մի օր էլ կտեսնենք կանաչ հատված է պակասել քաղաքից՝ այն էլ կրկին բենզալցակայանի վառ գաղափարի համար։ Ընդ որում, մի քանի կմ աջ կամ ձախ այս կետից դարձյալ կան բենզալցակայաններ։ Խնդիր է եւ այն, որ այս ապագա բենզալցակայանը գտնվում է «Սեբաստիա» հյուրանոցի քթի տակ՝ նույն մայթին եւ դժվար թե անվտանգության կանոնները որեւէ մեկին երբեւէ հետաքրքրի. թե՛ տերերին, թե՛ քաղաքապետին եւ թե՛ քաղաքաշինարար ճարտարապետներին։ Ս. Ս.
