«Երեխաները

ԿԱՐԴԱԼՈՒ ՀԵՏ ԳԼՈՒԽ ՉՈՒՆԵՆ «Երեխաները մեր ապագան են» մաշված կարգախոսը այսօր եւս շարունակվում է չարչրկվել՝ առանց լուրջ արդյունքների։ Իսկ թե ինչ հակումներ ու նախասիրություններ ունի մեր «ապագան», փորձել ենք պարզել Երեւանի Կենտրոն համայնքի դպրոցներից մեկում անցկացված հարցման միջոցով։ Պարզվում է, որ բարձր դասարանցիների 35%-ը դպրոց է հաճախում գիտելիքներ ստանալու համար, 25%-ը՝ դպրոցում տաք լինելու պատճառով, 15%-ը՝ գեղեցիկ հագուստները ընկերներին ցույց տալու, իսկ 20%-ը՝ ընկերներին տեսնելու համար։ Եվ ընդամենը 5%-ն է գնում դպրոց սիրելի ուսուցիչներին կարոտելու անկեղծ զգացումով։ Հարցման մասնակիցների 35%-ը նախընտրում է հումանիտար, 10%-ը՝ ճշգրիտ, 15%-ը՝ բնագիտական առարկաները։ Նրանց 15%-ը գերադասում է բոլոր առարկաները սովորել, իսկ 35%-ը ընդհանրապես «գլուխ չունի» դպրոցական ծրագրով ուսումնասիրվող որեւէ առարկայի հետ։ Բարձր դասարանցիների 60%-ը երազում է դպրոցն ավարտելուց հետո բուհ ընդունվել, 20%-ը նախընտրում է որեւէ արհեստի մեջ հմտանալ, 10%-ը ընդհանրապես ոչինչ չի կամենում սովորել, հետագայում որեւէ աշխատանքով զբաղվելու ցանկություն չունի 5%-ը։ Նրանց 5%-ը մտածում է Հայաստանից հեռանալու մասին։ Աշակերտների 10%-ին անչափ դուր են գալիս դպրոցում կազմակերպված գեղեցիկ միջոցառումները, 20%-ին՝ բովանդակալից դասերը։ 60%-ն ուղղակի «գժվում» է դասին չվերաբերող զրույցների համար։ 10%-ի կարծիքով դպրոցում հետաքրքիր ոչինչ չկա։ Հարցման մասնակիցների 50%-ը երազում է ազատվել ոչ պահանջկոտ եւ ոչ խիստ ուսուցիչներից, 20%-ը՝ պահանջկոտներից, 10%-ը կուզենար, որ դասաժամերի տեւողությունը կրճատվեր, 5%-ն, ընդհակառակը, որ դրանք երկարեին։ 15%-ը փափագում է երկարատեւ դասամիջոցներ վայելել։ 9-10-րդ դասարանի աղջիկների 40%-ը տարված է գեղեցիկ զարդերով ու հագուստներով, 20%-ը՝ դիսկոտեկներով, 10%-ը՝ ասեղնագործությամբ եւ տնային գործերով, 10%-ը որեւէ նախասիրություն չունի։ Եվ միայն 20%-ն է սիրում զբաղվել ընթերցանությամբ։ Տղաների 20%-ի հոբբին եվրոֆուտբոլն է, 40%-ինը՝ վիդեոֆիլմերը, 20%-ը սիրում է հաճախել դիսկոտեկներ, 10%-ը ազատ ժամանակը լցնում է գրքեր կարդալով, հաջորդ 10%-ը որեւէ լուրջ նախասիրություն չունի։ Հետաքրքիր մի հանգամանք եւս. պարզվում է, որ մերօրյա դպրոցականների 15%-ը կարեւորում է մարդու արտաքին տվյալները, 30%-ը՝ ինտելեկտը, 15%-ը՝ հագուստները, 10%-ը՝ համեստությունը, իսկ 30%-ը ազատամտությունը։ Ծնողական ժողովների առիթով դպրոց են գալիս 70%-ի մայրերը, 5%-ի՝ հայրերը եւ 5%-ի հարազատները։ Իսկ 20%-ի ճակատագրով, ուսման եւ առաջադիմության հարցերով չի հետաքրքրվում որեւէ մեկը։ Ինչեւէ, հարցման արդյունքները ցույց են տալիս, որ մեր «ապագային»՝ երեխաներին, առանձնապես ուշադրության չենք արժանացնում։ Իսկ մեծահասակների անտարբերությունից ծնվում է երեխաների անտարբերությունը կարեւոր արժեքների նկատմամբ։ Նրանք չունեն լուրջ նախասիրություններ, նպատակներ, մարդկանց գնահատում են ըստ արտաքին տվյալների ու հագուկապի։ ԳՈՀԱՐ ՀԱԿՈԲՅԱՆ