ՀԱՅՏԱՐԱՐՈՒԹՅՈՒՆ Խաղաղ հանրահավաքներ, երթեր, ցույցեր, ժողովներ անցկացնելու մարդկանց, քաղաքացիների իրավունքը ժողովրդավարության պարտադիր պայմաններից մեկն է եւ իր արտացոլումն է գտել նաեւ ՀՀ Սահմանադրությունում։ Մինչդեռ, իրականում իշխանությունները ո՛չ միայն չեն առաջնորդվում Սահմանադրության համապատասխան դրույթների պահպանումով, այլեւ՝ իրենց կամայական որոշումներով եւ գործողություններով սահմանափակում քաղաքացիների իրավունքները։ Իշխանությունների ապօրինի գործողությունների հետեւանքով. – տարբեր գերատեսչությունների, պետական կառավարման մարմինների, պաշտոնատար անձանց մակարդակով սահմանափակվում են ՀՀ քաղաքացիների հանրահավաքներ, ցույցեր, երթեր, ժողովներ անցկացնելու իրավունքները, – բռնություններ են կիրառվում խաղաղ հանրահավաքների եւ ցույցերի կազմակերպիչների նկատմամբ, 2000 թ. սեպտեմբերի 30-ի հանրահավաքին եւ ցույցին հաջորդեցին զանգվածային բռնություններ, ձերբակալվեցին երեք տասնյակից ավելի քաղաքացիներ։ Բռնություններ կիրառվեցին նաեւ 2001 թ. սեպտեմբերի 7-ի հանրահավաքի եւ ցույցի մասնակիցների հանդեպ, իսկ «Ժողովրդավարական Հայրենիք» կուսակցության ղեկավար Պ. Մակեյանը ենթարկվեց 10-օրյա ապօրինի ազատազրկման, – չի խրախուսվում հանրահավաքների, ցույցերի անցկացումը գովազդող հայտարարությունների հրապարակումը իշխանությունների կողմից վերահսկվող լրատվամիջոցներում, – խոչընդոտներ են հարուցվում ՀՀ քաղաքացիների՝ հանրահավաքներին, ցույցերին մասնակցելու գործընթացում։ Մասնավորապես, 2001 թ. սեպտեմբերի 28-ի եւ հոկտեմբերի 26-ի հանրահավաքների ժամանակ արձանագրվել են բազմաթիվ դեպքեր, երբ ոստիկանությունն արգելել է մարզերից ժամանող ավտոբուսների եւ միկրոավտոբուսների մուտքը Երեւան։ Մարդու իրավունքների եւ հիմնարար ազատությունների պաշտպանության հասարակական խորհուրդը խստիվ դատապարտում է իշխանությունների ապօրինի գործողությունները եւ պահանջում է քաղաքացիների Սահմանադրությամբ նախատեսված հանրահավաքներ, երթեր, ցույցեր, ժողովներ անցկացնելու իրավունքը։ Միեւնույն ժամանակ հայտարարում ենք, որ առաջնորդվելով ՀՀ Սահմանադրության 26, 44 հոդվածներով՝ ի նշանավորումն մարդու, քաղաքացիների ազատությունների եւ իրավունքների, ս/թ 10.12.01-ին, ժամը 15.00-ին, հրավիրում ենք երթ Երեւան քաղաքի Ազատության հրապարակից մինչեւ Բաղրամյան պող. եւ Պռոշյան փող. հատման խաչմերուկը։ Մարդու իրավունքների եւ հիմնարար ազատությունների պաշտպանության հասարակական խորհուրդ
