ՊԱՐՏՔԵՐԻ ՄԱՐՄԱՆ ԺԱՄԱՆԱԿԸ Ֆինանսների նախարար Վարդան Խաչատրյանի պաշտոնական հայտարարությունից բխում էր, որ պետությունը աշխատավարձերի վճարման պարտք չունի։ Մինչդեռ ֆիզիկայի ինստիտուտի նորանշանակ տնօրեն Հրաչյա Ասատրյանից (որն, ի դեպ, տարիներ առաջ ԿԳ նախարարությունում փոխնախարարի պաշտոն է զբաղեցրել) տեղեկացանք, որ օրերս ինստիտուտի աշխատակիցների 80%-ին վճարվել է ընդամենը 2, իսկ 20%-ին՝ 1 ամսվա աշխատավարձ։ Եվ պետությունը դեռ պետք է վճարի եւս 9 ամսվա աշխատավարձ, որ մոտավորապես 50 մլն դրամ է կազմում։ Թե առաջիկայում ե՞րբ կլինի բաղձալի գումարը, ինստիտուտի ղեկավարությունը հստակ չգիտի, սակայն պատրաստվում է վիճակը շտկել ներքին ռեսուրսների հաշվին՝ ակնկալելով նաեւ պետության աջակցությունը։ Ֆիզիկայի ինստիտուտի արհմիության նախագահ Լեւ Կոզլիները, սակայն, բացատրեց, որ 2 օր առաջ իրենց խոստացված աշխատավարձը այդպես էլ չի վճարվել, որովհետեւ ինստիտուտը էլեկտրաէներգիայի եւ կոմունալ ծառայությունների հսկայական պարտքեր է կուտակել։ Այս վերջինը նորանշանակ տնօրենը եւս ժխտեց։ Նա արդարացրեց դրանք վճարելու փորձեր կատարած նախկին ղեկավարությանը, սակայն այդպես էլ չկամեցավ հայտնել գումարի չափը։ Ի դեպ, Հ. Ասատրյանի՝ ֆիզիկայի ինստիտուտի տնօրեն նշանակվելու հետ, աշխատակիցների, արհկոմի նախագահ Լ. Կոզլիների հավաստմամբ, մեծ հույսեր են կապում՝ վստահ, որ հենց նա պետք է կարգավորի աշխատավարձերի ուշացման խնդիրը։ Ֆիզիկայի ինստիտուտն արդեն կես տարի աշխատում էր առանց տնօրենի, իսկ տնօրենի աշխատանքները կոորդինացնում էր ժամանակավոր պաշտոնակատար նշանակված փոխտնօրենը՝ Ալբերտ Ավետիսյանը։ ԳՈՀԱՐ ՀԱԿՈԲՅԱՆ
