ԱՍՈՒՄ ԵՆ, ՈՐ ՉԵՆ ՏԱԼԻՍ «Չենք պատրաստվում սեփականաշնորհել Արցախի կապի համակարգը»,- երեկ հեռախոսով մեզ հայտնեց ԼՂՀ կառավարությանն առընթեր էկոնոմիկայի եւ կառուցվածքային բարեփոխումների նախարար Առնոլդ Աբրահամյանը։ «Ազատագրված տարածքների պաշտպանություն» հասարակական նախաձեռնության հայտարարությունն այն մասին, որ «Արցախի կապավորները պատրաստվում են երկրի կապը օտարներին հանձնել», պրն Աբրահամյանն անվանեց «սխալ ինֆորմացիա»։ Նա հայտնեց, որ «Հեռահաղորդակցության մասին» ԼՂՀ օրենքը թեեւ թույլ է տալիս մասնավորեցնել կապի համակարգը, սակայն վերջինն ընդգրկված չէ «Մասնավորեցման մասին» ԼՂՀ օրենքով մասնավորեցման ենթակա օբյեկտների ցանկում։ Ավելին, առաջիկայում խորհրդարանի հաստատմանը ներկայացվելիք նույն օրենքը՝ 2001-2003թթ. համար, դարձյալ չի նախատեսում նման գործարք։ Պրն Աբրահամյանը հարկ համարեց հայտնել նաեւ, որ, ի տարբերություն «Հեռահաղորդակցության մասին» ՀՀ օրենքի, ԼՂՀ համանուն օրենքը չի թույլատրում մենաշնորհ կապի ոլորտում։ Ա. ԳՐԻԳՈՐՅԱՆ
