Միայն առաջին տեղեր Հոկտեմբերի սկզբներին Լոս Անջելեսում անցկացվեց «Կարատեի բոլոր աստղեր» անունը կրող միջազգային 37-րդ մրցաշարը։ Միջազգային կարատեի ասոցիացիայի, որի նախագահն է ճապոնացի սեւ գոտի 10-րդ դան Սոկե Տակեյոկու Կուբոտան, այս միջոցառմանը 16 երկրների 37 կազմակերպությունների հետ առաջին անգամ մասնակցեց նաեւ Հայաստանի յոթ հոգուց (5 տղա եւ 2 աղջիկ) կազմված երիտասարդական հավաքականը։ Արեւելյան մարտարվեստի մեր երիտասարդ վարպետների նորամուտը գերազանց էր։ Մեր թիմը հաջողությամբ մասնակցեց երկու մրցաձեւերի՝ կոմիտեի եւ կատայի մրցումներում։ Առաջինում հայաստանցի բոլոր կարատեիստներն էլ գրավեցին միայն առաջին տեղեր իրենց տարիքային խմբերում։ Նրանք են՝ Աշոտ Ղուկասյանը (14 տարեկաններ), Վազգեն Հարությունյանը (15), Ալբերտ Զաքարյանը (16), Հովհաննես Կարապետյանը (17), Գագիկ Պողոսյանը (18), Լուսինե Իսախանյանը (15) եւ Ռեմմա Հակոբջանյանը (16)։ Լուսինեն, Ռեմման եւ Ալբերտը առաջինն էին նաեւ կատաների կատարումում։ Վ. Միքայելյանը հատկապես նշեց, որ երիտասարդական հավաքականը համալրվել էր միայն Շոտոկան կարատեի ֆեդերացիայի սաներով։ Ընդ որում, Լոս Անջելես մեկնած մեր պատվիրակությունը ղեկավարել է այս, ինչպես նաեւ Հայաստանի կարատեի ֆեդերացիայի նախագահ, Շիհան սեւ գոտի 6-րդ դան Գրիգոր Միքայելյանը։ Վ. ՄԻՔԱՅԵԼՅԱՆ Հայաստանի կարատեի ազգային ֆեդերացիայի գլխավոր քարտուղար
