ՄՆԱՑԵԼ ԵՆՔ ՓՈՂՈՑՈՒՄ Հարգելի «Առավոտ», երկրորդ անգամ եմ դիմում ձեզ, խնդրելով ձեր թերթի միջոցով պարզաբանել, թե ինչու ինձ եւ իմ փոքրիկ՝ 8 տարեկան աղջկան, Քաշաթաղ գյուղից անօրինական, առանց դատարանի որոշման, առանց մեր ներկայության դուրս են գցել փողոց եւ տունը տվել ուրիշի։ Այս տարվա մայիսի 6-ին նամակով դիմել եմ ԼՂՀ նախագահ Արկադի Ղուկասյանին եւ ԼՂՀ գլխավոր դատախազին։ Նամակ եմ ուղարկել Քաշաթաղի դատախազ Խաչատրյանին։ Ստիպված եմ եղել հուլիսի 27-ին դիմել ՀՀ ԱԺ նախագահ Ա. Խաչատրյանին։ Վերջիններս էլ նամակս ուղարկել են ՀՀ գլխավոր դատախազին, սակայն ոչ մի պատասխան չեմ ստացել։ Երկու օր հետո դիմել եմ, այսպես կոչված, Մարդու իրավունքների հանձնաժողովի նախագահ Պ. Հայրիկյանին. նրանից էլ ոչ մի պատասխան չեմ ստացել։ Օգոստոսի 4-ին անձամբ դիմել եմ արդարադատության նախարարին. նրանից էլ ոչ մի պատասխան։ Օգոստոսի 10-ին դիմել եմ Ամենայն Հայոց կաթողիկոս Գարեգին Երկրորդին։ Մեկ խաչ տվեցին աղջկաս եւ՝ ոչ մի պատասխան։ Օգոստոսի 12-ին դիմել եմ ՍԴ նախագահ Գ. Հարությունյանին, նա էլ պատասխանեց, որ ինքն իրավասու չէ, բայց կաշխատի խոսել Քաշաթաղի վարչակազմի ղեկավարի հետ։ Խնդրում եմ ձեր թերթի միջոցով պարզաբանել այս անարդարությունը։ Մնացել ենք փողոցում՝ անօթեւան, անաշխատանք։ ԱԼԲԵՐՏ ԱՎԵՏԻՍՅԱՆ Քաշաթաղի առաջին բնակիչ, ազատամարտիկ, հաշմանդամ Քաշաթաղի վարչակազմի ղեկավար Ա. Հակոբյանը «Առավոտի» առաջին հրապարակումից հետո մեզ խոստացավ երկու օրվա ընթացքում պաշտոնապես պատասխանել։ Սպասում ենք։
