ՄԱՐՏԱՀՐԱՎԵՐ ԺՈՂՈՎՐԴԱՎԱՐՈՒԹՅԱ՞ՆԸ Գործող վարչակարգի հակասահմանադրական, հակաօրինական գործողությունների, վարվող հակաժողովրդավարական, ապազգային քաղաքականության վերաբերյալ «Ժողովրդավարական Հայրենիք» կուսակցությունն ի սկզբանե հանդես է եկել իր խիստ դիրքորոշմամբ, պարբերաբար ենթարկվելով քաղաքական հետապնդումների, բռնությունների եւ ահաբեկչության։ Իշխանությունների որդեգրած քաղաքականությունը շարունակվում է ավելի սանձարձակ ձեւերով ու մեթոդներով։ 2001 թ. հունիսի 25-ին մահափորձ կազմակերպվեց կուսակցության նախագահ Պ. Մակեյանի դեմ։ Սեպտեմբերի 7-ին հրավիրված հանրահավաքին իշխանությունների կողմից հրահրված սադրանքների արդյունքում՝ հակաօրինական ճանապարհով, բռնարարքների կիրառմամբ կալանվեց ԺՀԿ նախագահ Պ. Մակեյանը։ ԺՀԿ քաղաքական խորհուրդը՝ փաստելով իշխանությունների կողմից կազմակերպված հակասահմանադրական գործողությունները, դրանք ընդդիմադիր կուսակցության եւ նրա նախագահի նկատմամբ որակում է ոչ միայն քաղաքական հետապնդում, այլեւ մարտահրավեր ժողովրդավարությանը՝ իր բոլոր կանխատեսելի հետեւանքներով։ ԺՀԿ-ն, դատապարտելով կատարված անօրինականությունը, գործող իշխանություններից պահանջում է. 1. Կալանքից անհապաղ ազատ արձակել ԺՀԿ նախագահ Պ. Մակեյանին։ 2. Պատասխանատվության ենթարկել ապօրինի գործողությունների մեղավորներին։ «Ժողովրդավարական Հայրենիք» կուսակցության քաղաքական խորհուրդ
