«ՀԱՅՈՑ ՏՈՒՆԸ» ՀԱՅՏԱՐԱՐՈՒՄ Է «Հայոց տուն» կուսակցությունը շուրջ մեկ տարի է, ինչ դիմել է ՀՀ գլխավոր դատախազությանը՝ պահանջով քննության առնել Ռոբերտ Քոչարյանի, Սերժ Սարգսյանի, այլ բարձրաստիճան պաշտոնյաների պատասխանատվության հարցը, գտնելով, որ նրանց, առնվազն ծառայողական անփութության եւ պաշտոնեական անգործության հետեւանքով է հնարավոր դարձել «Հոկտեմբերի 27»-ը։ Առ այսօր մեր պահանջը ո՛չ մերժվում է, ո՛չ բավարարվում։ Որեւէ պատասխան, չնայած բազմաթիվ դիմումներին, չի տրվում։ Եվ կարելի՞ է, արդյոք, որեւէ պատասխան ակնկալել այն դեպքում, երբ գործի դատաքննությունն է խորը կոմայի մեջ, իսկ կազմակերպիչների մասով ողորմածիկ նախաքննությունը հանգել է զինդամբարանում… Համոզված ենք, որ ոչ միայն պատասխան չենք ստանալու մենք, այլ ընդհանրապես չեն բացահայտվելու «Հոկտեմբերի 27»-ի գլխավոր ոճրագործները, քանի դեռ Ռոբերտ Քոչարյանի ձեռքում է գտնվում իշխանության ղեկը։ Ուստի, պնդելով մեր հարցադրումը, պահանջում ենք նաեւ ժամանակավոր կասեցնել Ռոբերտ Քոչարյանի (ինչպես եւ մյուսների) պաշտոնավարումը՝ մինչեւ «Հոկտեմբերի 27»-ի գործի լիակատար ավարտը։ ՎԱՐԴԱՆ ՊԵՏՐՈՍՅԱՆ «Հայոց տուն» կուսակցության նախագահ 23.07.2001 թ.
