ԱՀՃ-Ն ՀԱՅՏԱՐԱՐՈՒՄ Է Օրինախախտությունը գործելակերպ դարձրած իշխանությունը այսօր անցել է մարդու իրավունքների եւ ազատությունների բացահայտ եւ լկտի ոտնահարմանը։ Այս ամենի ուղղակի արգասիքն է վերջին իրադարձությունների շղթան՝ օրենքի կոպիտ խախտմամբ «Հոկտեմբերի 27»-ի գործով վեց մեղադրյալների ազատ արձակումը դատարանի դահլիճից, մահափորձը «Ժողովրդավարական Հայրենիք» կուսակցության նախագահ, ԱՀՃ քաղաքական խորհրդի անդամ Պետրոս Մակեյանի վրա, ընդդիմադիր լրագրող Վ. Ղուկասյանի արհեստանոցի հրկիզումը, Ազգային համաձայնության ճակատի կողմից հրավիրված եւ քաղաքապետարանի հետ համաձայնեցված հունիսի 28-ի հանրահավաքի վիժեցման սադրիչ փորձերը։ ԱՀՃ-ն հայտարարում է, որ մթնոլորտի շիկացումը հանրապետությունում պայմանավորված է Ռ. Քոչարյանի վարած հանցավոր քաղաքականությամբ եւ ստեղծված իրավիճակի ու նրա հետ կապված զարգացումների ողջ պատասխանատվությունը ընկնում է վերջինիս վրա։ Կոչ ենք անում հանրապետության իրավապահ մարմինների, պետական համակարգի բոլոր աշխատակիցներին, չկատարել հանցավոր հրամաններ եւ գիտակցել իրենց պատասխանատվությունը ազգի ու պետականության ապագայի առջեւ։ ԱՀՃ քաղաքական խորհուրդ 27.06.01
