ՀԱՂԹԵՑԻՆ ՍԱԲՐԻՆԱ ՇՄԻԴՏԸ ԵՎ…ԲԱՐԵԿԱՄՈՒԹՅՈՒՆԸ Ինդիրա Գանդիի՝ Հայաստան կատարած այցի 25-ամյակին նվիրված սեղանի թենիսի մրցաշարը եզրափակվեց հաջողությամբ։ Շաբաթ առավոտյան սկսված բարեկամության ու մարզական եղբայրության պայքարին մասնակցեց Չինաստանի դեսպանության անձնակազմը՝ դեսպան Ցզու Ցժաշունի գլխավորությամբ։ Մասնակիցների մեջ էին նաեւ գլխավոր կազմակերպիչ՝ Հնդկաստանի դեսպան Բալ Անանդը ու հնդիկ բարձրաստիճան դիվանագետներ, Ֆրանսիայի փոխհյուպատոս Ժան-Միշել Օրելը՝ դեսպանության աշխատակիցների հետ, UNHCR-ի Հայաստանի գրասենյակի տնօրեն Լոյդ Դաքինն ու իր տիկինը, UNICEF, IMF եւ այլ միջազգային կազմակերպությունների ներկայացուցիչներ։ Գերմանիայի դեսպանության դիվանագիտուհի Սաբրինա Շմիդտը, աշխատակիցների հետ, փայլուն խաղ ցուցադրեց եւ հաղթելով իր բոլոր մրցակիցներին՝ եզրափակիչում պարտության մատնեց չինացի դիվանագետ Վանգին՝ 2։0 հաշվով։ Այսպիսով, 20-րդ դարի կին քաղաքական գործիչ Ինդիրա Գանդիի հուշամրցաշարը շահեց… երկու զավակների մայր գերմանացի դիվանագիտուհին, որը տարիներ առաջ խաղացել է Գերմանիայի ակումբային չեմպիոնատներում։ Մրցաշարի ավարտին, որին ներկա էին նաեւ ՀՀ արտաքին գործերի նախարարության աշխատակիցները (արարողակարգի փոխպետ Վահան Չարխչյանի ղեկավարությամբ), Իտալիայի դեսպան Անդրեա Տրաբալցան, Հնդկաստանում ՀՀ դեսպան Արմեն Բայբուրդյանը, տեղի ունեցավ «ժամանակավոր» մրցանակաբաշխություն։ Շուտով, պաշտոնական արարողությամբ, հաղթողներին կհանձնվի հնդիկ վարպետների պատրաստած գավաթները՝ նվիրված Ինդիրա Գանդիի՝ 1976թ. Հայաստան այցին։ ՀԱՄՈ ՄՈՍԿՈՖՅԱՆ
