«ՍԱ ԲԱՑԱՐՁԱԿ ՆՈՐ ԱԿՑԻԱ Է» ՀՀ Դեմոկրատական կուսակցությունը ուղղակիորեն դեմ է Հայաստանում կատարվող սեփականաշնորհման բոլոր գործընթացներին։ Եվ սեփականաշնորհման ցանկում որեւէ նորություն կամ փոփոխություն նկատելու դեպքում անմիջապես դիմում է լրատվամիջոցներին, կարծես, ցանկանալով նախապես առնել սպասվող «վտանգի» առաջը։ ՀԴԿ-ին այս հարցում նեցուկ են լինում 20-ից ավելի կուսակցություններ, որոնք որպես մի ամբողջական կոմպանիա, ունեն նույն նպատակն ու դիրքորոշումը։ Երեկ տեղի ունեցավ կուսակցության հերթական ասուլիսը, ինչպես միշտ, ՀԴԿ գրասենյակում։ ՀԴԿ նախագահ Արամ Սարգսյանը խոսեց մասնավորեցման ցուցակում տեղի ունեցած նոր փոփոխությունների մասին։ 2000- 2002թթ. պետական գույքի մասնավորեցման ծրագրի ցուցակը ԱԺ-ին է ներկայացրել ՀՀ կառավարությունը։ Ըստ Ա. Սարգսյանի, ցանկում ներգրավված են էներգիա արտադրող հիմնական ձեռնարկությունները, այդ թվում Սեւան-կասկադը, Որոտանի ՀԷԿ-երը, Երեւանի, Հրազդանի եւ մի շարք այլ ՋԷԿ-եր։ Պրն Սարգսյանի տվյալներով, ցանկում ընդգրկված են նաեւ «Զվարթնոց» օդանավակայանը, բեռնահամալիրը, նախկին ռազմաարդյունաբերական համալիրի մի շարք ձեռնարկություններ։ «Ի՞նչ սկզբունքով են սեփականաշնորհվում այդ օբյեկտները»,- հարցնում է ՀԴԿ նախագահը։ Նրա կարծիքով, օբյեկտների սեփականաշնորհման արդյունքում կարող է ուղղակի ավերվել ամբողջ տնտեսությունը. «Մենք գտնում ենք, որ այս ցանկը միանշանակ պետք է դուրս բերվի ԱԺ քննարկումից»,- ասաց Արամ Սարգսյանը։ Հ. Մ.
