ԿԱՐՈՂ Է ԲՈՒՄԵՐԱՆԳԻ ՊԵՍ ԽՓԵԼ Մի տեսակ սպասում կա, որ ե՛ւ «Հայաստան» պատգամավորական խումբը, ե՛ւ ՀԺԿ-ն դուրս կգան իրենց իսկ առաջարկով ստեղծված խորհրդարանական ժամանակավոր հանձնաժողովից, որովհետեւ, ակնհայտորեն, չի ստեղծվել այնպիսի հանձնաժողով, որն ի վիճակի կլինի աշխատել առանց վերեւից եկող ցուցումների։ «Առավոտի» այս հարցին «Հայաստան» պատգամավորական խմբի ղեկավար Մյասնիկ Մալխասյանը պատասխանեց. «Ի սկզբանե ես համոզված չեմ եղել, որ հանձնաժողովն այն, ինչ որ սպասում է հասարակությունը, սպասում ենք մենք, չի կարող իրականություն դարձնել, բայց հանձնաժողովի ստեղծման պահից սկսված գործընթացը խորհելու տեղիք է տալիս։ Կարծում եմ, այդ ուղղությամբ պիտի լուրջ մտածել, որովհետեւ հանձնաժողովի ստեղծումը բումերանգի նման կարող է խփել հենց հայտարարություն անող կողմերից»։ «Հայաստան» խմբի ղեկավարի կարծիքով, բարոյական չէր, որ հանձնաժողովի նախագահը ՀԺԿ-ից չընտրվեց։ Մեր հարցումին՝ որ շահագրգիռ կողմը պահանջել է, որ ՀՀԿ-ն այլ թեկնածուի պաշտպանի, հակառակ դեպքում կսկսվեր կառավարությանն անվստահություն հայտնելու գործընթացը, պրն Մալխասյանն ասաց, որ ինքն այդ մասին տեղեկություն չունի, բայց «կարծում եմ, քաղաքական գործընթացների մեջ պիտի կարողանալ տարբերակել, թե որն է ավելի կարեւոր։ Եթե անձնական շահով չես առաջնորդվում եւ գերադասում ես ավելի շատ քաղաքական շահը, ժողովրդի շահը, պետության շահը, կարծում եմ, որ չպիտի նման գործընթացներ տեղի ունենան»։ Սեփ. լր.
