ԿԱՊԻ ՎԻՃԱԿՆ ԱՆՄԽԻԹԱՐ Է «ԱրմենՏելի» ներդրումային պարտավորություններն ուսումնասիրող խորհրդարանական հանձնաժողովում ԱԺՄ-ն ներկայացնելու է այս կուսակցության ղեկավար Վազգեն Մանուկյանը։ Այս առնչությամբ արդեն իսկ տարակուսանք հնչեց, թե ինչու է նման կարգի քաղաքական գործիչն ընդգրկվել այս հանձնաժողովում։ Աննախադեպ այս իրողությունը մեկնաբանելու «Առավոտի» խնդրանքին ի պատասխան ԱԺՄ նախագահ Վազգեն Մանուկյանն ասաց. «Նախ եւ առաջ՝ ինձ այդ հարցը շատ է հետաքրքրում։ Երբ 1990-ին մենք եկանք իշխանության, բացի այն հարցերից, որ պետք էր անցնել մասնավոր սեփականության, անկախություն եւ այլն՝ մի քանի ծրագրեր կային, որոնց ես հատուկ ուշադրություն էի դարձնում։ Մեկը կապի միջոցներն էին։ Մենք պայմանագիր կնքեցինք ամերիկյան ATT ֆիրմայի հետ։ Եթե մենք ուզում ենք սփյուռքի հետ կապվել, բիզնեսով զբաղվել, անկախ լինել՝ մեզ կապի անկախ միջոցներ էին պետք, դրա համար շատ էի կարեւորում դա։ Այդ պատճառով միշտ հետեւում եմ, թե ինչ է կատարվում կապի ոլորտում։ Գտնում եմ, որ շատ վատ վիճակում ենք։ Խոսքը միայն այն մասին չէ, որ աղքատ մարդկանց համար դժվար է վճարել հեռախոսային վարձը։ Մենք հետ ենք ընկնում ինտերնետից։ Մենք հետ ենք մնում հեռահաղորդակցման այլ ժամանակակից միջոցներից։ Եվ կարեւորելով այս ամենը՝ ես մաս կազմեցի այս ժամանակավոր հանձնաժողովին»։ Ա. Ի.
