ԻՐԻՆԱ ԲԱԲԱՅԱՆԸ ՎՐԴՈՎՎԱԾ Է Ինչպես արդեն տեղեկացրել էինք, ապրիլի 30-ին ԼՂՀ արդարադատության ներկայացուցիչները եղել էին Սամվել Բաբայանի բնակարանում՝ գույքագրման պատրվակով։ Երեկ մենք հեռախոսազրույց ունեցանք ԼՂՀ ազգային հերոսի կնոջ՝ Իրինա Բաբայանի հետ։ Նա հայտնեց, որ մեր տեղեկատվությունը, գույքագրման հետ կապված, համապատասխանում է իրականությանը։ Ինչպես վրդովված շարունակեց, արդարադատության ներկայացուցիչները զգուշացրել էին նաեւ, որ Սամվել Բաբայանի ողջ գույքը կառգրավվի 10 օր հետո, ըստ ԼՂՀ ԳԴ որոշման։ Իրինա Բաբայանը եւ 3 անչափահաս երեխաները, փաստորեն, ստացվում է, որ ոչ մի իրավունք չունե՞ն Մամիկոնյան 19, բնակարան 9/10-ի նկատմամբ եւ, առհասարակ, ամուսնու, հոր ունեցվածքի հանդեպ։ ԼՂՀ արդարադատության ներկայացուցիչները հասկացրել են նաեւ, որ Ի. Բաբայանը կարող է դիմել դատարան 50% գույքային պահանջով։ Մեր այն հարցին, թե արդյոք մտածո՞ւմ է դիմել դատարան, տիկին Բաբայանն ասաց, որ ոչ։ Նա տեղեկացրեց նաեւ, որ Սամվել Բաբայանը Շուշիի բերդում է, եւ վերջին անգամ ամուսնուն տեսակցել է ս/թ ապրիլի 3-ին։ Ի դեպ, 2 ամիսը մեկ անգամ թույլատրվում է սննդամթերք (մինչեւ 50 կգ), իսկ 3 ամիսը մեկ՝ տեսակցություն։ Ս. Բաբայանին թերթեր չի տրվում, կապ չկա արտաքին աշխարհի հետ եւ, ինչպես Ի. Բաբայանը բնութագրեց՝ «բեսպրիդելը շարունակվում է» նրա նկատմամբ։ Ռ. Մ.
