ԷԼԻՆԱՆ ԵՎ ԼԻԼԻԹԸ ԱՌԱՋԱՏԱՐՆԵՐԻ ՇԱՐՔՈՒՄ ԵՆ Շախմատի Եվրոպայի կանանց անհատական առաջնությունը շուտով կհատի եզրագիծը։ Հայտնի կդառնան այն 29 երջանիկները, ովքեր մրցաշարի արդյունքներով իրավունք կստանան ուժերը չափել նաեւ աշխարհի առաջնությունում։ Երեկ կայացած 9-րդ՝ նախավերջին տուրից հետո մեր հանրապետության ուժեղագույն շախմատիստուհին՝ միջազգային գրոսմայստեր Էլինա Դանիելյանը 6,5 միավորով բաժանում է 4-րդից 12-րդ տեղերը եւ աշխարհի առաջնության ուղեգիր նվաճելու գերազանց հնարավորություն ունի։ Հաջող է հանդես գալիս նաեւ մեր երկրորդ գրոսմայստերը՝ Լիլիթ Մկրտչյանը։ Նա 6 միավորով 13-րդից 28-րդ տեղերը բաժանող շախմատիստուհիների շարքում է եւ նույնպես կարող է բաղձալի ուղեգիրը նվաճել, եթե վերջին տուրում հաջող հանդես գա։ Մեր հանրապետության մյուս երկու ներկայացուցիչները՝ Նելլի Աղինյանը եւ Գոհար Հլղաթյանը 4-ական միավորով ընթանում են մրցաշարային աղյուսակի միջին հորիզոնականներում։
