ՑԵՂԱԿՐՈՆ Է ԵՎ ՀԱՆԴՈՒՐԺՈՒՄ Է ԿՈՄՈՒՆԻՍՏՆԵՐԻՆ ՀՀԿ խորհրդի ընդլայնված նիստում վարչապետ եւ ՀՀԿ խորհրդի նախագահ Անդրանիկ Մարգարյանը հայտարարել էր. «Ցեղակրոնությունը, որ մեր կուսակցության գաղափարախոսությունն է, տալիս է մեզ դասեր, ուղեցույց է մեզ համար։ Նժդեհի կյանքն ու գործունեությունը, ուսմունքը իրենց մեջ խտացրել են վերջին 100-ամյակների՝ ցեղի ստեղծած ու պահպանած արժեքները։ Մեզ համար սուրբ են Զատիկյանի, Նավասարդյանի, Վազգեն Սարգսյանի մտքերն ու թողած ծրագրերը»։ Հետաքրքիր է, թե ինչպես է նման ազգային եւ ցեղակրոն մեկը վերաբերվում այն իրողությանը, որ նաեւ իր գլխավորած կուսակցության թողտվությամբ՝ ի հաշիվ ազգային տոների, գերակայություն է տրվում ապազգային տոնակատարություններին։ Ի՞նչ զգաց նախկին խորհրդային քաղկալանավոր Անդրանիկ Մարգարյանը մայիսի 1-ին՝ լսելով կոմունիստական կոչերն ու ուռռաները, տեսնելով հրապարակները ողողած խորհրդային կարմիր դրոշները։ «Առավոտի» այս հարցին ի պատասխան վարչապետն ասաց. «Մայիսի 1-ը կոմունիստական տոն չի, այլ սոցիալիստական։ Ավելի շատ դա երեւի դաշնակցության տոնն էր, ոչ թե կոմունիստների։ Ուղղակի կուսակցությունները երեւի մի քիչ ակտիվ չեղան, որ կարողանան տեր կանգնել դեռեւս 19-րդ դարում եղած նախաձեռնությանը։ Բոլոր դեպքերում, դա տոն եմ համարում աշխատավորության համար։ Կարելի է տոնել, դրա համար էլ կառավարությունը դրան համաձայնել է։ Հարկավոր է հաղթահարել կարծրատիպերը՝ կոմունիստական չէ Մայիսի 1-ը»։ Անդրանիկ Մարգարյանը տեղյակ չէր ԱԺ-ի երեկվա քննարկումներից, որ մերժել են նշել փետրվարի 20-ը, Սարդարապատի ճակատամարտը եւ ազգային այլ նշանակություն ունեցող օրեր, բայց վստահ էր, որ նոր տոնացույցում «կարմիր տոներն այդքան շատ չեն»։ Ի դեպ, Աշոտ Նավասարդյանի մտքերից մեկն է. «Հանրապետականներն առյուծներ են, իսկ առյուծը սոված կսատկի, բայց հոտած միս չի ուտի»։ Թերեւս այնքան էլ սուրբ չէ այս պատգամը, որ ՀՀԿ-ականները (թեեւ նրանց առյուծ էլ չես անվանի) զանազան պատրվակներով չեն խորշում կոմունիստների հետ նույն, մեղմ ասած, հին միսն ուտել։ Ա. Ի.
