ՇՆՈՐՀԱՆԴԵՍ Հայաստանի Գրողների միությունում կայացավ «Արտասահմանյան գրականություն» ամսագրի շնորհանդեսը։ Ներկա էին ՀՀ-ում ԱՄՆ-ի արտակարգ եւ լիազոր դեսպան Մայքլ Լեմոնը, Հնդկաստանի արտակարգ եւ լիազոր դեսպան Բալ Անանդը։ Ամսագրի առաջին համարը լույս է տեսել ԱՄՆ դեսպանատան աջակցությամբ։ Այդ կապակցությամբ Մայքլ Լեմոնին շնորհվեց ՀԳՄ-ի «Սայաթ-Նովա» շքանշանը։ Իր հերթին Հնդկաստանի դեսպանն էլ խոստացավ օգնել այդ ամսագրին, որով հայ իրականության մեջ առաջին անգամ պարբերաբար կհրապարակվի արտասահմանյան գրականություն։ Պարբերականի գլխավոր խմբագիրն է Աշոտ Խաչատրյանը։ Հայ գրողների գնահատականով՝ ամսագրում տեղ գտած թարգմանությունները բարձրարժեք են։ Պուշկինի, Քամյուի, Սարտրի եւ համաշխարհային գրականության այլ մեծերի գործերը ամսագրում տեղ էին գտել գեղեցիկ, «զրնգուն» հայերենով։ Մնում է միայն հուսալ, որ հանդեսը ինչպես շռնդալից մուտք գործեց հայ իրականության մեջ, այնպես էլ կմնա՝ պահպանելով ավանդույթները։ ՏԻԳՐԱՆ ՌՇՏՈՒՆԻ
