Հայաստանում գործող գրեթե բոլոր կուսակցություններին այսօր հուզում է էներգետիկ բաշխիչ ցանցերի սեփականաշնորհման հարցը։ Նրանք երեկ հավաքվել էին ՀԴԿ գրասենյակում։ «Մենք մեկ հարց լուծելու համար ենք միավորվել։ Այս բոլոր կազմակերպությունները նպատակ ունեն չեղյալ հայտարարել այս մրցույթը, որովհետեւ նրա պայմանները, մեր բոլորիս կարծիքով, բավարար չեն եւ առաջին հերթին խաթարելու են մեր ազգային անվտանգությունը, մեր տնտեսական անկախությունը եւ, ինչու չէ, քաղաքական»,- ասաց ՀԴԿ նախագահ Արամ Սարգսյանը։
ՀԺԿ ներկայացուցիչ Արամայիս Բարսեղյանը դատապարտելով այդ գործընթացը, կարծիք հայտնեց, որ դա ոչ միայն մեծ հարված է սոցիալապես անապահով խավերին (քանի որ բարձրանալու է էներգիայի սակագինը), այլեւ լուրջ վտանգ՝ մեր արտադրությանը։ Պրն Բարսեղյանի կարծիքով, կառավարությունը կրակի հետ է խաղ անում եւ «բոլորիս գլուխը դնում է հարվածի տակ»։ Ըստ Արշակ Սադոյանի, եթե չկարողանան նպատակին հասնել, վերջին քայլը կլինի ժողովրդին դիմելը (հանրահավաք կազմակերպելու համար)։ Ա. Սադոյանը վստահ է, որ պետության հաջորդ հանցագործ քայլը լինելու է Սեւան-Հրազդան կասկադի սեփականաշնորհումը։
Հ. Մ.
