1999 թվականի խորհրդարանական ընտրություններից հետո վարչապետ Վազգեն Սարգսյանը նախագահ Քոչարյանին առաջարկել էր արտադրական ենթակառուցվածքները համակարգող նախարարի պաշտոնում նշանակել Վահան Շիրխանյանին։ Այդ առիթով նախագահ Քոչարյանը վերջինիս հրավիրել է զրույցի եւ հայտարարել, որ նրան նախարար է նշանակում, բայց «դեղին քարտով» ու միայն Վ.Սարգսյանի պնդմամբ։
Երբ դիմեցինք Վ.Շիրխանյանին ճշտելու եւ մեկնաբանելու այս տեղեկությունն ու «դեղին քարտ» ստանալու շարժառիթը, վերջինս պարզաբանեց, որ նախագահ Քոչարյանը նկատի է ունեցել նախորդ գումարման խորհրդարանում Երեւանի կոնյակի գործարանի մասնավորեցմանը վերաբերող հարցը։ Նախագահ Քոչարյանն ասել էր, թե այդ հարցում Շիրխանյանն իր դեմ էր դուրս եկել:
Նախկինում ԱԺ «Երկրապահ» խմբի պատգամավորներից մեկն այդ դեպքը մանրամասնելով՝ ասաց, թե Կոնյակի գործարանի մասնավորեցման հարցի քննարկման օրերին Վ.Սարգսյանն արտերկրում է եղել։ Իմանալով ԱԺ-ում սկսված քննարկումների մասին, նա ՊՆ բարձրաստիճան պաշտոնյաներից մեկին հանձնարարել է միջոցներ ձեռնարկել, որ «Երկրապահ» խումբը նախագծին «դեմ» քվեարկի։ Այդ գործը ստանձնել էր հենց Վահան Շիրխանյանը։ Սկզբնական շրջանում խմբի համար հանձնարարականը պարզ է եղել։ Սակայն հարցի քվեարկության օրը մի շարք պատգամավոր բանագնացներ են մեկնել նախագահ Քոչարյանի մոտ, ներկայացրել իրավիճակն ու պատգամավորների շրջանում Վ.Շիրխանյանի ծավալած գործունեությունը։ Արդյունքում, խմբում այս հարցի շուրջ տարակարծություններ են սկսվել։ Օրինագիծն, ի վերջո, իհարկե, ընդունվել է։
Ժամանակին նախագահի կողմից «դեղին քարտ» ստացած նախկին նախարարը հիմա քաղաքականությամբ է զբաղվում եւ անդամակցում է իշխանություններին ընդդիմադիր «Ազգային համաձայնության ճակատի» ձեւավորմանն ու դրա աշխատանքներին։ Հնարավո՞ր է, որ «դեղին քարտն» առաջիկայում փոխարինվի «կարմիրով»։ Այս հարցին պարոն Շիրխանյանը պատասխանեց. «Ռոբերտ Քոչարյանը կարող է տարբեր գույների քարտեր ցույց տալ իր դաշտում գործող մարդկանց։ Այսօր ես այդ դաշտում չեմ եւ «կարմիր քարտ» ստանալու մտավախություն չունեմ»։
Կարդացեք նաև
Սեփ. լր.
