Հեռուստատեսության եւ ռադիոյի ազգային հանձնաժողովի կազմը եւս ուշադրություն գրավեց իր հստակ նախագահամետությամբ։ Ռոբերտ Քոչարյանի աշխատակազմի ղեկավարի տեղակալը պիտի նախագահի հանձնաժողովը, իսկ իշխանամետ թերթերից մեկի խմբագրի տեղակալն էլ ընտրվեց փոխնախագահ։
Թեեւ ԱԺ-ն մտադիր էր «Հեռուստատեսության եւ ռադիոյի մասին» օրենքի միջոցով ապահովել այդ լրատվամիջոցների անկախությունը, գործնականում ուղղակի օրենսդրորեն ամրագրվեց գրեթե բոլոր հեռուստաընկերությունների նախագահական ենթակայությունը։ «Առավոտի» այս դիտարկման առնչությամբ ԱԺ Գիտության, կրթության, մշակույթի եւ երիտասարդության հարցերի հանձնաժողովի նախագահ Շավարշ Քոչարյանն ասաց. «Նոր նշանակումներն է՛լ ավելի ապացուցեցին, որ եթե Սահմանադրության մեջ լուրջ փոփոխություններ չկատարվեն ու չսահմանափակվեն նախագահի լիազորությունները, ապա ուղղակի անիմաստ է հույս դնելը, թե նախագահը կփորձի լինել անաչառ՝ սա ուղղակի բացառվում է։ Դա առանց այն էլ ակնհայտ էր, բայց ուղղակի համոզվեցինք՝ տեսնելով ընթացող այս գործընթացը»։ Այդ գործընթացին պրն Քոչարյանի գնահատականն էր. «Նախագահը ձգտում է նշանակել այն մարդկանց, ովքեր իր համար կանխատեսելի են»։
Շավարշ Քոչարյանը նշեց, որ եթե ազգային հանձնաժողովի անդամների մասին, այնուամենայնիվ, ոչինչ չի կարող ասել, քանի որ դեռեւս չեն սկսել իրենց գործունեությունը, «ապա Հանրային հեռուստատեսության եւ ռադիոյի խորհրդի նախագահն արդեն իսկ կոպտորեն խախտում է օրենքը եւ նույնիսկ հպարտանում դրանով»։
Սեփ. լր.
