Երեկ քաղաքապետարանում տեղի ունեցած ասուլիսի ժամանակ քաղաքապետարանի Առեւտրի եւ սպասարկման վարչության պետի տեղակալ Սամվել Եգանյանը լրագրողներին հայտնեց, որ բացօթյա առեւտուրը Երեւանում, կարելի է ասել, կանոնակարգվել է։ Հիշեցնենք, որ փողոցային առեւտրի դեմ ուղղված աշխատանքները, որոնք սկսվել էին հունվարի 25-ից, պետք է անցկացվեն մինչեւ մարտի 1-ը։
Ս. Եգանյանի տվյալներով, Երեւանում կար շուրջ 10 գյուղմթերքների շուկա, որոնցից գործում էր 10- 15%-ը։ «Այդ շուկաներում այսօրվա դրությամբ կարող էին ընդգրկվել 6500 հոգի»,- ասաց պրն Եգանյանը եւ հավաստիացրեց, որ բացօթյա առեւտուր իրականացնողներն այդքան չեն։ Նա հայտնեց, որ շուկաների տերերի հետ պայմանավորվել են 300-1200 դրամ օրավարձ սահմանելու համար։ 1200 դրամը վերաբերում է Երեւանի կենտրոնական շուկաներին (թիվ 1՝ Մաշտոցի պողոտա եւ թիվ 2՝ ԳՈՒՄ-ի շուկա), մնացած շուկաները ավելի էժան են՝ 300-400 դրամ։
Խնդիրներ կան կապված Մալաթիա-Սեբաստիա շուկայի ներքեւի փողոցներում գտնվող բացօթյա առեւտրի կետերի հետ, որտեղ առեւտուր են անում 3000-4000 մարդ։
Ըստ Ս. Եգանյանի, ոչ բոլորն են մտել շուկա (30-35%-ը չի մտել) եւ քողարկված ձեւով շարունակում են վաճառքը։
Կարդացեք նաև
Հ. ՄՈՎՍԻՍՅԱՆ
