Երեկ տեղի ունեցավ ՀԱՕԿ-ի գործկոմի հերթական նիստը, որի օրակարգը բավականին հագեցած էր օրախնդիր հարցերով։ Հստակեցվեցին ՀԱՕԿ-ի երեք փոխնախագահների՝ Միքայել Իսպիրյանի, Ռազմիկ Ստեփանյանի եւ Գագիկ Ծառուկյանի աշխատանքների ոլորտները, ընտրվեցին տասնչորս հանձնաժողովների նախագահներ՝ նպատակով, որ այդ հանձնաժողովներն այսուհետեւ լինեն աշխատող։
Գործկոմի անդամները քննարկեցին մարզական կազմակերպությունների՝ ՀԱՕԿ-ին անդամակցելու մի քանի տասնյակ հայտերը, որոնցում ներկայացրել էին իրենց թեկնածուներին։ Ներկայացված անունների ցանկում կային նաեւ կանանց անուններ։ Եվ դա համապատասխանում է ՄՕԿ-ի կանոնադրությանը, որով նախատեսվում է, որ յուրաքանչյուր Ազգային օլիմպիական կոմիտեի կազմի մոտ տասը տոկոսը լինեն կանայք։
Առանձնապես ընդգրկուն էր Հայաստանի օլիմպիական հավաքականների նախապատրաստության համալիր ծրագիրը, որի շուրջ ծավալվեցին բուռն քննարկումներ։ Այդ ծրագիրը պետք է ուղեցույց լինի Հայաստանի բոլոր հավաքական թիմերի համար՝ անկախ դրանց տարիքային առանձնահատկություններից։ Շահագրգիռ քննարկում եղավ 2002 թ. ձմեռային օլիմպիական խաղերի նախապատրաստության եւ մասնակցության հարցերի շուրջ։
Եվ վերջում մի նոր երեւույթի մասին, որն, ըստ էության, նորություն է մեզանում։ Կասկածից վեր է, որ առանձնակի ուշադրություն է պահանջում նաեւ ՀԱՕԿ-ի ֆինանսական գործունեությունը, որի մասին մանրամասն հաշվետվություն ներկայացվեց (արդեն երկրորդ անգամ) գործկոմի անդամներին։ Այս սկզբունքը լինելու է մշտական ու հաշվետվություն ներկայացվելու է յուրաքանչյուր ամիս։
