«Ամենաընկերասեր» ավիաընկերությունը Հայաստանում 2001թ. մարտի 26-ին «Ավստրիական ավիաուղիների» առաջին ինքնաթիռը կիջնի Երեւանի «Զվարթնոց» օդանավակայանում, իսկ մեկ ժամ հետո կվերադառնա Վիեննա։ Այսպիսով, «Ավստրիական ավիաուղիները» կհաստատվեն Հայաստանում։ Երեկ այս մասին լրագրողներին տեղեկացրին «Օսթրիան Էյրլայնզի» Կենտրոնական եւ Արեւելյան Եվրոպայի տարածքային մենեջեր Ինգրիդ Բենդելը եւ Հայաստանի ու Վրաստանի տարածքային մենեջեր Եվա Բերգերը։ Մարտի 1-ից Հայաստանում կբացվի «Օսթրիան Էյրլայնզի» գրասենյակը։ Ինչպես նշեց տիկին Բենդելը՝ «Երեւանն ու Վիեննան, որոնք հանդիսանում են իրենց երկրների կարեւորագույն պատմամշակութային կենտրոնները, այսպիսով կկապվեն իրար հետ»։ Թռիչքները տեղի կունենան առայժմ շաբաթական 2 անգամ՝ երկուշաբթի եւ ուրբաթ օրերին, իսկ հունիսից՝ նաեւ չորեքշաբթի։ Թռիչքի տեւողությունը 3 ժամ 50 րոպե է։ Ընկերությունը ավիաթռիչքներ է կազմակերպում 125 ուղղություններով (67 երկրների 125 քաղաքներ), իսկ եթե հաշվենք «Սթարլայնզ» միավորման մեջ մտնող զուգընկերների հետ տրանզիտ թռիչքները եւս, դրանց թիվը կհասնի 880-ի։ Ընկերության մենեջերները հպարտությամբ նշում էին. «Վիեննայի օդանավակայանը հանդիսանում է տրանզիտային օդանավակայան, որտեղ «Ավստրիական ավիաուղիները» ապահովում են 25 րոպեից ոչ ավելի տրանզիտային կանգառ։ Ծայրահեղ դեպքում, երբ սպասման ժամանակը երկարաձգվում է, ուղեւորների տրամադրության տակ են ռեստորանները եւ խանութները»։ «Ավստրիական ավիաուղիներն» ապահովում է զեղչերի համակարգ եւ բարձրակարգ սպասարկում. «Մենք համարվում ենք աշխարհի ամենաընկերասեր (երեւի բարեհամբո՞ւյր- Մ. Բ.) ավիաընկերությունը»,- մենեջերների այս խոսքերին ստիպված ենք հավատալ առանց ստուգելու։ Թանկ կնստի։ Մ. Բ.
