ԳԻՏՆԱԿԱՆՆԵՐԸ ԴԱՏԱՊԱՐՏՈՒՄ ԵՆ ՀՀ ԳԱԱ արհմիության միացյալ կոմիտեն երեկ հրապարակեց հունվարի 19-ին տեղի ունեցած համաակադեմիական ժողովի արդյունքում ընդունված որոշումը, որը ուղարկվել է ՀՀ նախագահին, վարչապետին եւ ՀՀ ԱԺ նախագահին։ Որոշման մեջ փաստվում է. «Գիտության եւ գիտաշխատողների նկատմամբ ՀՀ իշխանությունների անտարբեր եւ արհամարհական վերաբերմունքը, որն արտահայտվեց նաեւ ՀՀ վարչապետի, ֆինանսների նախարարի, ԱԺ գիտության եւ կրթության մշտական հանձնաժողովի նախագահի ընդհանուր ժողովին մասնակցելու հրավերի մերժումով»։ Գիտնականները որոշել են. 1. Դատապարտել մեր երկրում գիտական օջախների եւ գիտական ներուժի ոչնչացմանը նպաստող ՀՀ իշխանությունների անհանդուրժելի արհամարհական վերաբերմունքը։ 2. Պահանջել ՀՀ կառավարությունից՝ ա) այսուհետ ամեն ամիս վճարել թեմատիկ ֆինանսավորում ունեցող գիտական հիմնարկների աշխատողների աշխատավարձը եւ մինչեւ ս.թ. ապրիլ ամիսը փակել 2000թ. ընթացքում կուտակված աշխատավարձերի ամբողջ պարտքը, ինչպես նաեւ ԳԱԱ համակարգի ինստիտուտների թերֆինանսավորման հետեւանքով գոյացած տնտեսական պարտքերը, բ) գիտահետազոտական աշխատանքների արդյունավետ կատարման համար ապահովել բյուջեով նախատեսված ամենամսյա լրիվ ֆինանսավորումը, գ) գործնականորեն հովանավորել հիմնարար գիտության զարգացումը, առանց որի մրցունակ եւ շահութաբեր կիրառական գիտություն չի կարող գոյություն ունենալ, դ) լուրջ ուշադրություն դարձնել ԳԱԱ համակարգի աշխատողների սոցիալական վիճակի բարելավմանը, բարձրացնել նրանց աշխատավարձը։ 3. Հավանություն տալ այլ գերատեսչական պատկանելության գիտական հիմնարկների համախմբվելու եւ գիտական աշխատողների իրավունքները համատեղ պաշտպանելու առաջարկությանը։ Սեփ. լր.
