Իր երեկվա ասուլիսում պաշտպանության նախարար Սերժ Սարգսյանը հայտարարեց, որ 95 թվականին ձեռնարկած «Վահան Հովհաննիսյան+30» գործի հետ կապված ինքը Վահան Հովհաննիսյանի հետ «որեւէ խնդիր չունի» եւ խորհուրդ տվեց այդ հարցով զրուցել անձամբ պրն Հովհաննիսյանի հետ:
«Առավոտը», ինչպես միշտ, բաց է բոլոր կուսակցությունների ներկայացուցիչների, այդ թվում նաեւ՝ Վահան Հովհաննիսյանի համար: Սակայն մինչեւ կարողանանք համոզել պրն Հովհաննիսյանին՝ մեր թերթին հարցազրույց տալ, փորձենք պարզապես տրամաբանել: Եվ այսպես, 95-ին Ազգային անվտանգության նախարար Սերժ Սարգսյանը Վահան Հովհաննիսյանի եւ նրա ընկերների դեմ առաջ է քաշել մեղադրանքներ՝ այդ թվում պետական հեղաշրջման փորձի եւ Վազգեն Մանուկյանի դեմ մահափորձի: Այսօր նա պրն Հովհաննիսյանի հետ խնդիր չունի, ինչը կարելի է մեկնաբանել երկու տարբերակով:
Տարբերակ թիվ 1. հեղաշրջման փորձը եւ մահափորձի նախապատրաստությունն այսօր պրն Սարգսյանը հանցագործություն չի համարում, քանի որ ռեժիմը (որի ժամանակ նա այդ պատասխանատու պաշտոնն էր զբաղեցնում) հանցավոր էր, իշխանությունը թալանում էր ժողովրդին, ծծում էր նրա արյունը etc, etc` տես պաշտոնական քարոզչության հայեցակարգը: Հնարավոր է նույնիսկ, որ առաջ քաշելով այդ մեղադրանքները, անվտանգության նախարարը հոգու խորքում համակրում էր Վահան Հովհաննիսյանի ձգտումներին:
Տարբերակ թիվ 2. Վահան Հովհաննիսյանը 95 թվականին ոչ մի հեղաշրջում եւ մահափորձ չէր նախապատրաստում:
Կարդացեք նաև
Այդ դեպքում Սերժ Սարգսյանը գործ էր սարքում անմեղ մարդու դեմ եւ հիմա դրա համար խորապես զղջում է:
Ա. Ա.
