Երեկ Հայաստանի Դեմոկրատական կուսակցության կազմկոմիտեի անդամները մամուլի ասուլիս էին հրավիրել, որտեղ հանդես եկան հայտարարությամբ.
«Ադրբեջանի այն հայտարարությունը, թե մենք խախտել ենք իրենց տարածքային ամբողջականությունը, մենք չենք ընդունում եւ կոչ ենք անում մեր իշխանություններին, որպեսզի պնդեն, որ մենք երբեւիցե չենք խախտել Ադրբեջանի տարածքային ամբողջականությունը։ Մենք տարածքային պահանջներ Ադրբեջանի առջեւ չենք դնում, այլ հարց է, եթե խոսք գնա նաեւ Արցախի այն հատվածին, որը մինչ օրս չի ազատագրվել։ Ազատագրվել են միայն հայկական պատմական հողերի մի մասը, այն էլ դա արվել է այնպես, ինչպես պահանջում էր միջազգային իրավունքի նորմերը»։
ՀԴԿ-ի նախագահ Արամ Սարգսյանը հարկ է համարում «հնարավորինս շուտափույթ գործողություններ ձեռնարկել, քանզի Եվրախորհուրդը պահանջում է Լեռնային Ղարաբաղի հարցի խաղաղ կարգավորում»։ Նշենք, որ պրն Սարգսյանը դժգոհեց նաեւ Ռ. Քոչարյանի վերջերս արած այն արտահայտությունից, թե «հարկ է տարածքային ամբողջականությունը եւ ինքնորոշման իրավունքը մեր հարթության վրա դնել»։
– Դա անընդունելի է, քանզի ղարաբաղյան կողմն այս արտահայտությանն ի պատասխան ասում է, թե «Ձեր տարածքում, ինչքան ուզում եք ինքնորոշվեք, բայց մեր տարածքում դուք կարող եք, լավագույն դեպքում, ունենալ միայն լայն ինքնավարություն»։
Կարդացեք նաև
Վերջում պրն Սարգսյանն ասաց. «Անընդմեջ խոսում ենք փոխզիջումներ անելու մասին։ Սակայն, ինչպես ականատես ենք լինում՝ ադրբեջանական կողմը որեւէ կոմպրոմիսի չի գնում։ Ուստի, ես արտաքին գործերի նախարարությանն առաջարկում եմ ստեղծել կայուն իրավական դաշտ, նոր միայն լուրջ քայլեր ձեռնարկել։ Կամ ԱԳՆ-ն պետք է հերքի մեր այսօրվա պնդումները, կամ՝ ընդունի եւ պաշտպանի այս դիրքորոշումը։ Ի վերջո, Ղարաբաղը անդրկովկասյան երկրներից միակն է, որ շուրջ 200 տարի փորձում է մտնել Եվրոպա եւ հարկ եղած դեպքում կարելի է սպասել եւս 200 տարի, միայն թե խաղաղ պայմաններում»։
Ա. ԴԱԲԱՂՅԱՆ
