Օրերս «Առավոտը» տեղեկացավ, որ Հայաստանի Հանրապետության Գիտությունների ազգային ակադեմիայի հնագիտության եւ ազգագրության ինստիտուտը արդեն մի քանի օր հոսանքազրկված է, եւ տնօրենը ստիպված լույս է քաշել հիմնարկության հարեւանությամբ գտնվող կոշիկի նորոգման կրպակից։
Այս լուրը ճշտելու համար դիմեցինք ինստիտուտի տնօրեն Արամ Քալանթարյանին։ Ըստ նրա՝ «Հիմնարկության լույսերը անջատվել էին միայն մեկ օրով՝ զուտ տեխնիկական որոշ խնդիրներ լուծելու համար»։ Մի քանի օրով անջատել էին նաեւ հեռախոսները՝ պարտքեր ունենալու պատճառով։ Հիմա պարտքերը մարված են եւ առաջիկա օրերին հեռախոսները կմիացվեն։ Բացի այն, որ ինստիտուտը որեւէ «պարտք ու պահանջ» չունի, շուտով կավարտվեն նաեւ շենքի վերանորոգման՝ պետբյուջեից ֆինանսավորվող աշխատանքները։ Երբ փորձեցինք կոշիկի նորոգման կրպակից ճշտել՝ արդյո՞ք լույս է տարվել հարեւան հիմնարկություն, կոշկակարը բարկացած պատասխանեց. «Դա էր մնում պակաս, որ կոշկակարի բուդկից լույս քաշեին: Դե, որ էդ էլ ինձանից քաշեին, բա էլ պետությունը ո՞ւմ ա պետք»։
Ա. ԴԱԲԱՂՅԱՆ
