Պետեկամուտների նախարարն ու դեղ ներկրողները պայմանավորվածություն են ձեռք բերել մինչեւ ապրիլի 1-ը հիվանդացածության ողջ սպեկտորը չթանկացնել։
Այս մասին երեկ կայացած մամուլի ասուլիսի ընթացքում հայտարարեց ՀՀ պետական եկամուտների նախարար Անդրանիկ Մանուկյանը։ Առաջին անհրաժեշտության շուրջ 27 խումբ դեղամիջոց կպահպանի իր գինը։ Մինչեւ ապրիլի 1-ը, ըստ Անդրանիկ Մանուկյանի, կուսումնասիրվի իրավիճակը, որից հետո կորոշվի՝ գնա՞լ փոփոխությունների, թե՞ ոչ։ Դեռեւս պրն Մանուկյանը խուսափում է կանխատեսումներ անել ապրիլի 1-ից սպասվող փոփոխությունների մասին։
Պետեկամուտների նախարարը համաձայնեց լրագրողներից մեկի այն դիտարկման հետ, թե ներկրողները ստիպված իրենց վնասների հաշվին են գնալու այդ քայլին։ «Իհարկե, նրանք որոշ վնասներ կրելու են, բայց մենք կօգնենք, որպեսզի այդ վնասները այն աստիճանի չհասնեն, որ ձեռնարկությունները լուծարվեն կամ սնանկանան»,- նշեց պրն Մանուկյանը։ Սակայն պետեկամուտների նախարարը ժխտեց «Առավոտի» այն լուրը, թե ներկրողները պնդում են, իբր Անդրանիկ Մանուկյանը ասել է՝ դեղերը վաճառեք մի գնով, իսկ հաշվապահությունը ներկայացրեք մեկ այլ թվով։
Թե երկու կողմերից որն է իրավացի, դատել չենք կարող, քանի որ հանդիպումներն անցնում են «փակ գաղտնի»։ Թեպետ պրն Մանուկյանն անընդհատ խոսում է կեղծ ինվոյսային արժեքներով դեղ ներկրողների մասին, այդուհանդերձ մինչ օրս չի ցանկանում հրապարակել նրանց անունները։
Կարդացեք նաև
Լ. Մ.
