Եթե վարչապետը չասի, որ զբաղված է
Այն, ինչ տեղի կունենա ԳԱԱ-ում հունվարի 19-ին, աննախադեպ իրադարձություն է։ ԳԱԱ-ի արհմիությունների միացյալ կոմիտեի նախագահ Կիմա Միքայելյանի հավաստմամբ, ակադեմիայի մոտ յոթանասնամյա գործունեության մեջ դեռ չի եղել, որ ակադեմիայի ընդհանուր մեծ ժողով հրավիրվի՝ քննարկելու գիտնականների սոցիալական պաշտպանվածության հարցերը։
Հիշեցնենք, որ այս քայլին դիմելու սպառնալիքը հնչել էր գիտնականների բողոքի ցույցի ժամանակ։ Վերջիններս ստիպված են նման ծայրահեղ քայլի դիմել, քանի որ կառավարությունն այդպես էլ չվճարեց նրանց չորս ամսվա աշխատավարձը։ Ըստ տիկին Միքայելյանի, կառավարութ յունն իրենց պարտք է 240 մլն դրամ։ Թեեւ գիտնականները պահանջել էին, որ վճարեն միանգամից հինգ ամսվա աշխատավարձը, բայց տվել էին միայն օգոստոսինը։ «Ասել էին, որ սեպտեմբերն էլ կտան, բայց մեզ հուսախաբ արեցին»,- ասաց Կ. Միքայելյանը։ Վերջինս նաեւ տեղեկացրեց, որ երեկ ակադեմիայի ինստիտուտների արհկոմների ներկայացուցիչները հանդիպել են ԳԱԱ նախագահի հետ եւ քննարկել ընդհանուր ժողովի օրակարգը։ Այսինքն՝ Ֆադեյ Տաճատիչը լիովին պաշտպանում է գիտնականների նախաձեռնությունը։
Ընդհանուր ժողովի գլխավոր նպատակը պետք է լինի հաշվետվության հրավիրել պետական բարձրաստիճան այրերին։ Հրավերներին պատասխանելու վերջին ժամկետը դեկտեմբերի 29-ն էր։ Արձագանքել է միայն ԱԺ-ի կրթության, գիտության, մշակույթի եւ երիտասարդության հարցերի հանձնաժողովի նախագահ Շավարշ Քոչարյանը։ Պաշտոնական հրավերներ դարձյալ կուղղվեն ՀՀ վարչապետին եւ էկոնոմիկայի ու ֆինանսների նախարարին։ Ու որպեսզի «հանկարծ չլինի, որ վարչապետն ասի, թե զբաղված է», գիտնականներն իրենց ժողովը հատուկ հրավիրել են ուրբաթ օրը, երբ ոչ ԱԺ-ի, ոչ էլ կառավարության նիստ կա։ Գիտնականները հուսով են, որ պետական այրերը կպատասխանեն իրենց հուզող հարցերին, մասնավորապես, թե ինչպես է այս պետությունը պատրաստվում պահել գիտնականներին ու գիտական համակարգը։
Կարդացեք նաև
Ակադեմիայի ընդհանուր ժողովին կմասնակցեն ակադեմիական ինստիտուտների կոլեկտիվների կողմից ընտրված ներկայացուցիչները, իսկ ժողովը կնախագահի ԳԱԱ-ի արհմիությունների միացյալ կոմիտեն։ Դատելով բողոքի ցույցի ժամանակ արտահայտած տրամադրություններից՝ որոշ գիտնականներ ավելի կտրուկ քայլերի կողմնակից են՝ բավարար չհամարելով կառավարության հետ լեզու գտնելու նման խաղաղ միջոցները։
Ն. ՀՈՎՀԱՆՆԻՍՅԱՆ
