ԳՈՐԾԸ ԴԵՌ ՉԻ ՄՏԵԼ ԴԱՏԱՐԱՆ Այս տարվա հունիսի 27-ի լույս 28-ի գիշերը իր բնակարանում գտնվեց դանակի մի քանի հարվածներից մահացած ՊՆ հաշվողական կենտրոնի ծրագրավորման բաժնի պետ, մայոր Արսեն Հենրիկի Մանուկյանի անշնչացած դիակը։ Ի՞նչ ընթացքում է այս գործը, եւ ի՞նչ հայտնի դարձավ մեզ։ Բնակարանը, ուր կատարվել էր դեպքը՝ Նոր Նորքի 2-րդ զանգվածի ուսանողական հանրակացարանի 3-րդ մասնաճյուղում էր գտնվում, շենք, որտեղ ելումուտ անելը նկատելի կլիներ, որովհետեւ այն մշտապես հսկվում էր պահակի կողմից։ Արսենի մարմինը ընկած էր խոհանոցում, գլխի տակ եղել է բարձ, «բարձին կից դրված ապակյա բաժակ՝ դատարկ վիճակում»։ Արսենի հայրը՝ Հենրիկ Մանուկյանը, տեղեկացրեց, որ դեպքից կես ժամ հետո ինքը եղել է թիվ 22 բնակարանում։ Նա ասաց, որ նախնական վարկածն էր ինքնասպանություն գործելը, ապա կասկածի տակ է դրվել նրա կինը՝ ՊՆ վերոնշյալ կենտրոնի աշխատակցուհին, ապա… շրջանառության մեջ դրվեց, որ նրան սպանել են։ Վարկածներ, որոնց իրականությանը մոտ լինելու պատասխանը կտա նախաքննությունն իրականացնող մարմինը՝ զինդատախազությունը։ Ի դեպ, տուժողի իրավահաջորդը նշեց, որ այդ գիշեր Արսենը մենակ չէր, տանն էր կինը, որը «ուժեղ թրմփոց» է լսել, շունը, որը զարմանալիորեն … լռել է։ Դեպքի վայրի զննությունը սկսվել է նույն օրը ժամը 4-ին, ավարտվել՝ 6։35-ին։ «Որովայնի շրջանում եղած թվով 3 ծակած-կտրած, խոռոչները թափանցող վնասվածքները՝ ներքին օրգանների վնասումով, Ա. Մանուկյանը չէր կարող պատճառել ինքն իրեն, իսկ ձախ արմնկահոդի մակերեսային վնասվածքը կարող էր հասցնել ինչպես Ա. Մանուկյանը, այնպես էլ որեւէ ուրիշ անձ» հետեւություններ է արել փորձագետներից Է. Եղիազարյանը, որոնց եզրակացությունն օրեր առաջ տրվեց տուժողի իրավահաջորդ հորը։ Տեղեկացնենք, որ քրեական գործը դեռ դատարան չի հասել։ Այս ժամանակամիջոցում Հ. Մանուկյանը դիմել է ՀՀ նախագահի, կառավարության աշխատակազմերին, ԱԺ-ին՝ պահանջելով վերահսկողություն իրականացնել գործի ընթացքի վրա։ Արսենը 36 տարեկան էր, 1992-ից աշխատում էր ՊՆ համակարգում, մասնակցել էր Շուռնուխի ինքնապաշտպանական մարտերին։ Այնուհանդերձ, հարցերի հարցը մնում է այն, որ եթե շենք որեւէ անծանոթ անձնավորություն մուտք չի գործել, ապա շրջանակն, ըստ էության, նեղանում է (գուցե շենքի որեւէ բնակչի կողմի՞ց է իրականացվել այս ոճիրը…)։ Հայրը խմբագրությանը հանձնեց ՊՆ նախարար Ս. Սարգսյանին ուղղված մի զեկուցագիր (որի հաջորդ երեսը չկար), որով աշխատավարձ էին փոխանցել Արսենի կնոջը։ Ըստ այդ զեկուցագրի, որը գրվել է Արսենի կողմից, խոսք է գնում ՊՆ հաշվողական կենտրոնի եւ կապի վարչության գործունեության մասին, այն մասին, որ հաշվողական կենտրոնը կապի վարչության ենթակայությանը հանձնելը նպատակահարմար չէ։ Ռ. Մ.