Ռոբերտ Քոչարյանը
ՀՀ նախագահը, Մինսկում Հեյդար Ալիեւի հետ իր ավանդական հանդիպումն անցկացնելուց հետո, զուտ հայրենասիրական մտահոգություն հայտնեց. Ղարաբաղի հարցը պետք է լուծել մինչեւ 2003 թվականի ընտրությունները, «հակառակ դեպքում՝ հարցը կդառնա ներքաղաքական շահարկումների առարկա»: Ճիշտ է ասում նախագահը՝ կան դեռեւս մեզանում անգիտակից գործիչներ: Բա կարելի՞ է Ղարաբաղի հարցը շահարկման առարկա դարձնել: Բա պարկեշտ մարդը այդ խնդիրը աթոռին հասնելու համար կօգտագործի՞: Մի՞թե վարչապետ Քոչարյանը 97-ին եւ 98-ի սկզբին այդպես էր վարվում:
Գագիկ Կոստանդյանը
Կարդացեք նաև
Պատասխանելով Ավանի թաղապետի այն մեղադրանքին, թե սույն պատգամավորը ջեռուցման համար պարտքեր ունի, սպայական պատվի գլխավոր ասպետը խրոխտ հայտարարեց, որ ինքը պարտք է միայն ծնողներին եւ Հայրենիքին: Բնականաբար, իրավացի է պրն Կոստանդյանը. դեռեւս խորհրդային ժամանակներից ԲԽՍՍ-ի քննիչներն իրենց անբասիր վարքով եւ ժուժկալ կյանքով բազմաթիվ պարտքեր են կուտակել, որոնք առ այսօր չեն կարողացել վերադարձնել:
Վլադիմիր Դարբինյանը
Զարմանալիորեն իրատեսական համոզմունք հայտնեց Խորհրդային Հայաստանի հոբելյանի կապակցությամբ ՀԿԿ ԿԿ 1-ին քարտուղար ընկ. Վ.Դարբինյանը. «Մենք վստահ ենք, որ մեր ժողովուրդը նորից կվերադառնա սոցիալիստական վերածննդի ուղի»: Ահա թե ինչով է զբաղված կոմունիստ նախարար Լեոնիդ Հակոբյանը մի կառավարությունում, որն իր բյուջեն կազմում է IMF-ի առաջարկներով. ներսից քայքայիչ աշխատանք է կատարում՝ երկիրը սոցիալիստական ուղու վրա թեքելու նպատակով:
ԱՐԱՄ ԱԲՐԱՀԱՄՅԱՆ
