94 մեծամասնական, 37 համամասնական պատգամավորական տեղեր սահմանելու վերաբերյալ օրինագիծը, ըստ Անդրանիկ Մարգարյանի՝ ընդամենը մեկն էր «Ընտրական օրենսգրքում» նախատեսվող փոփոխություններից։ Արդեն իսկ ձեռք են բերվել համաձայնություններ այն բոլոր խնդիրների վերաբերյալ, որոնք քաղաքական լուծում են պահանջում։ «Առավոտի» հարցին, թե մյուս փոփոխություննե՞րն էլ են հատ-հատ քննարկվելու, թե՞ փաթեթով՝ վարչապետը պատասխանեց. «Արդեն կներկայացվի փաթեթով՝ ըստ մեր նախնական պայմանավորվածության»։
ԵՐԿՐԱՊԱՀ ԹԵԿՆԱԾՈՒ ՉԿԱ. ՄԻՋԱԴԵՊԵՐ ՉԵ՞Ն ԼԻՆԻ
Աջափնյակի թաղապետի 3 թեկնածու կա։ ՀԺԿ-ից Արտակ Սարգսյանը գտնում է, որ ընտրություններում իր հիմնական մրցակիցն, անկասկած, Արծրուն Խաչատրյանն է։ Վերջինս վստահ է, թե ինքն այս անգամ մրցակից չունի։ Կոմունիստ Մելիք Վարդանյանն էլ նախորդ երկուսին իր մրցակիցներն է համարում։ Բայց նրանք բոլորն էլ պատրաստակամ են հանդիպել, քննարկել եւ համագործակցել, որ ազատ ու արդար ընտրություններ անցկացվեն. առանց ընտրակաշառքների ու կեղծիքների։ Մնում է հանդիպել։
Կարդացեք նաև
ԼՈ՞ՒՐՋ Է ԱՐԴՅՈՔ ՆԱԽԱՐԱՐԻ ՓՈՓՈԽՈՒԹՅՈՒՆԸ
«Նախագահ Քոչարյանը մինչ Ձեզ նշանակելն անընդհատ ասում էր, թե մոտակա ժամանակներս լուրջ փոփոխություն չի լինի կառավարության կազմում։ Ըստ այդմ, Ձեր նշանակումն անլո՞ւրջ է»,- ֆինանսների եւ էկոնոմիկայի նորանշանակ նախարար Վարդան Խաչատրյանին հարցրեց «Առավոտի» թղթակիցը։ «Դժվար է ասել։ Ես էլ այդպես, շատ լուրջ չեմ ընդունում այդ փոփոխությունը»,- կեսկատակ արձագանքեց պրն Խաչատրյանը։
ԲԱՐԵԲԱԽՏԱԲԱՐ ՎԻՐԱՎՈՐ Է
Մեր թերթի նոյեմբերի 22-ի համարում տպագրված «Փեթակում» կռիվ եղել է» հրապարակման մեջ նշել էինք, որ «ըստ չճշտված աղբյուրների», ՀՀ նախագահի թիկնապահի մասնակցությամբ ծեծկռտուքի ժամանակ զոհվել է 25 տարեկան մի տղա։ Ճշտվեց, որ Խաչիկ անունով այդ երիտասարդը ողջ է, գլխից ծանր վիրավորված։ Մնում է հուսալ, որ մեղավորները (որոնք գուցե բարձր հովանավորություն են վայելում) կպատժվեն։
