Նոյեմբերի 21-ին «Նեզավիսիմայա գազետա» թերթը տպագրել է մի «դիմում», որը շատ է հիշեցնում ցարական «ախռանկայում» պատրաստած փաստաթղթերը։ Դիմումի սկզբում շարադրվում է Արեւմտյան Հայաստանը Թուրքիայի կողմից զավթելու պատմությունը։ Այնուհետեւ «Արեւմտյան Հայաստանի ներկայացուցչությունը Ռուսաստանում» առաջարկում է գործողությունների ծրագիր։ Վերջինս ներառում է կազմկոմիտեի ստեղծում, որի մեջ մտնելու են Արեւմտյան Հայաստանի տարբեր հայրենակցական, տարածաշրջանային միությունների պատվիրակներ՝ Արեւմտյան Հայաստանի ժողովրդի վտարանդի ներկայացուցչական օրգանների ստեղծման նպատակով։
«Ներկայացուցչությունը» նպատակ ունի «հաշվառել Արեւմտյան Հայաստանի ժողովրդին» եւ ստեղծել Արեւմտյան Հայաստանի վտարանդի Ազգային ժողով։ Նախատեսվում է ձեւավորել արեւմտահայկական վտարանդի կառավարություն, որն արեւմտյան հայերի շահերն է ներկայացնելու տարբեր բանակցություններում եւ միջազգային ատյաններում։ Առաջարկում է անցկացնել Արեւմտյան Հայաստանի ժողովրդի համագումար 2001 թվականին Լոզանում կամ Սեւրում՝ այդ ժողովրդի լիիրավ ներկայացուցիչների մարմիններ ստեղծելու նպատակով։
Ի պատասխան «Առավոտի» խնդրանքին՝ մեկնաբանել այդ «դիմումը», ՀՅԴ ԳՄ անդամ Գեղամ Մանուկյանը իր ներկայացրած Մարմնի կողմից նշեց, որ Դաշնակցությունը այդ նախաձեռնությունների հետ որեւէ կապ չունի։
«ՆԱ ԿՈՂՄ Է ՑԱՆԿԱՑԱԾ ՔԱՅԼԻ»
Կարդացեք նաև
ԱԺ պետաիրավական հարցերի հանձնաժողովին դիմում էր ներկայացվել Մեղրիի տարբերակի եւ հոկտեմբերի 27-ի հնարավոր կապի մասին լսումներ անցկացնելու առաջարկով։ Լուրեր էին պտտվում, որ դիմումը ետ է վերցրել ՀԺԿ նախագահի պաշտոնակատար Ստեփան Դեմիրճյանը՝ Ռոբերտ Քոչարյանի առաջարկով։
Իսկությունը փորձեցինք պարզել ՀԺԿ գրասենյակից։ Մեզ պատասխանեցին, որ դիմումը Քոչարյանի առաջարկով ետ վերցնելու մասին լուրը հերյուրանք է, իսկ Ստեփան Դեմիրճյանը կողմ է ցանկացած քայլի, որը կնպաստի հոկտեմբերի 27-ի ճշմարտության բացահայտմանը, բայց նաեւ գտնում է, որ դա չպետք է արվի միայն ըստ հարազատների դիմումի։
«ԿՈՐԱԾԸ» ՎԵՐԱԴԱՐՁԱՎ ՀՈՍՊԻՏԱԼ
«Կորել» է զինվոր» («Առավոտ», 18.11.2000 թ.) հրապարակման մեջ տեղեկացրել էինք, որ կենտրոնական զինվորական հոսպիտալից անհետացել է հիվանդ զինծառայող Արտյոմ Սամվելի Շահինյանը, որին փնտրում էր նաեւ ռազմական ոստիկանությունը։ Երեկ տեղեկացանք, որ ս/թ նոյեմբերի 20-ին, ժ. 18.30-ին Ա. Շահինյանը կամավոր ներկայացել է հոսպիտալի նյարդաբանական բաժանմունք, որտեղից փախել էր, եւ նրան ընդունել են… զինվորական դատախազության միջամտությունից հետո։
ԱՋԱԿՑՈՒՄ ԵՆ ԱՐԿԱԴԻ ՎԱՐԴԱՆՅԱՆԻՆ
«Հայ երիտասարդ գործարարների աջակցության կենտրոն» հասարակական կազմակերպությունը հանդես է եկել հայտարարությամբ, որում, մասնավորապես, ասված է. «Հանրապետությունում հոկտեմբերի 30-ից տեղի ունեցած զանգվածային ձերբակալություններին հաջորդեցին «հատուկ ծառայությունների» կոպիտ ու անսքող միջամտությունները։ Արկադի Վարդանյանն առ այսօր գտնվում է կալանքի տակ։ Մենք համարում ենք, որ ժողովրդավարական հռչակված երկրում քաղաքական հալածանքները եւ ձերբակալությունները անթույլատրելի են։ Մեր երկրի ապագան երիտասարդները տեսնում են մարդու իրավունքների անկաշկանդ դրսեւորման եւ ժողովրդավարական արժեքների անվերապահ հաստատման մեջ»։ Հայտարարության մեջ կոչ է արվում պատգամավորներին՝ աջակցել Ա. Վարդանյանին։
Սեփ. լր.
