«Ընտրական օրենսգրքի» քննարկումներն ԱԺ երկու հանձնաժողովների նախագահների միջեւ բառային փոխհրաձգության առիթ դարձան։ «Հանձնաժողովի եզրակացության փոխարեն՝ Նիդեռլանդների փորձից պատմեցիք»,- նկատողություն արեց Վահան Հովհաննիսյանը Վիկտոր Դալլաքյանին։ Վերջինս հեգնանքով ողջունեց. «Շատ ուրախ եմ, որ ըմբռնեցիք Նիդեռլանդների փորձը. դա խոսում է Ձեր բարձր ինտելեկտի մասին»։ Վիկտոր Դալլաքյանը մեկ էլ Սերգո Երիցյանին կպավ, որի «որպես միամիտ լոռեցի՝ պատասխանեք միամիտ լոռեցուս հարցին» այսպես արձագանքեց. «Քանի որ Ձեզ հարգում եմ՝ չեմ ասի, թե անհասկացողը Դուք եք։ Ես դա չեմ ասում»։ Ի վերջո, Սերգո Երիցյանն էլ բռնկվեց կոմունիստ Նորիկ Պետրոսյանի այն ասածից, թե «կուսակցությունները շատ ավելի հեշտ են կաշառվում»։ «Եվ կոմունիստներն առաջի՛ն հերթին»,- ասաց պրն Երիցյանը։
ԱՇԽԱՏԱՎԱՐՁԵՐԻ ՊԱՐՏՔԵՐԸ ԿՍԱՌԵՑՎԵ՞Ն
ԱԺ փոխնախագահ Գագիկ Ասլանյանն անհրաժեշտ է գտնում սառեցնել աշխատավարձերի, թոշակների եւ նպաստների 1999-2000-ին գոյացած պարտքերի վճարումը, հաջորդ տարվա բյուջեի մուտքերը դարձնել իրատեսական եւ «նոր 2001 թվականից խոսել ե՛ւ աշխատավարձերի, ե՛ւ թոշակների, ե՛ւ նպաստների ժամանակին վճարումների մասին ու ժամանակացույց սահմանել սառեցված պարտքերն ընթացքում մարելու համար»։ Ըստ Գագիկ Ասլանյանի՝ «Հակառակ դեպքում ստիպված ենք լինելու էլի տնտեսվարող սուբյեկտների գրպանները տնտղել՝ նրանց վերջին ունեցածը պոկելու նկատառումով։ Սրան պիտի վերջ տրվի»։
