«Արդեն մի քանի անգամ եղել է՝ լրջագույն պայմանավորվածությունները հանկարծ տապալվել են, ավազին հավասարվել։ Հիմա եթե այս դեպքում էլ այսպես պիտի լինի՝ առնվազն մեր խմբակցությունը դիմելու է Հայաստանի նախագահին՝ խորհրդարանը լուծարելու առաջարկով,- ԱԺ ամբիոնից երեկ սպառնաց ՀՅԴ բյուրոյի քաղաքական ներկայացուցիչ Վահան Հովհաննիսյանը։- Թող ժողովուրդը, որն ուշադրությամբ հետեւում է այս քննարկումներին, հանրաքվեով որոշի այն հարցը, թե Հայաստանում համամասնակա՞նը կարեւոր կլինի ավելի, թե՞ մեծամասնականը»։
Ո՞ՒՐ ԵՆ ՀԱՕԿ-Ի ՂԵԿԱՎԱՐՆԵՐԸ
Այսօր Հայաստանի ազգային օլիմպիական կոմիտեի գործկոմի նիստում պետք է լսվի հրաժարական տված ՀԱՕԿ-ի նախագահ Բենուր Փաշայանի հաշվետվությունը, Հայաստանի ազգային օլիմպիական կոմիտեի ֆինանսական հաշվետվությունը։ Սակայն, ըստ հավաստի աղբյուրների, վերջին 10-12 օրվա ընթացքում ՀԱՕԿ-ի նախագահը չի ներկայացել աշխատանքի եւ նրա գտնվելու վայրի մասին ոչ մի տեղեկություն չկա։ Հիշեցնենք, որ արդեն մոտ երկու ամիս է, ինչ անհայտ է ՀԱՕԿ-ի գործադիր տնօրեն Գագիկ Չոբանյանի գտնվելու վայրը։
Կարդացեք նաև
ԱՅԴ ՄՂՁԱՎԱՆՋԱՅԻՆ ԲԱՌԸ՝ ՋԵՌՈՒՑՈՒՄ
ԱԺ պատգամավոր Գագիկ Կոստանդյանը երեկ Ավանի բնակիչների դժգոհությունը փոխանցեց հայտարարության տեսքով։ Ըստ այդմ, չնայած անցած տարի Ավանում օրական ընդամենը 4 ժամ ջեռուցում է եղել՝ բայց վարձավճարներ պահանջվել են ամբողջ օրվա համար։ «Եվ այսօր էլ դեմագոգիկ ձեւով հայտարարում են, թե ժողովուրդը ջեռուցման վարձը չի վճարում,- ասաց Գագիկ Կոստանդյանը։- Իրավապահները պիտի զբաղվեն այս հարցով եւ ժողովրդին փրկեն այս տաժանակիր, մղձավանջային գումարները վճարելուց»։
