Ճեղքվածքը շարունակում է աճել «Ազգային ժողովի որեւէ հանձնաժողով առայժմ չի սկսել 2001 թվականի քննարկումները»,- երեկ «Առավոտին» ասաց ԱԺ ֆինանսական, բյուջետային եւ տնտեսական հարցերի մշտական հանձնաժողովի նախագահ Վարդան Բոստանջյանը, որը, ըստ որոշ պատգամավորների, այդ հանձնաժողովի թափուր մնացած նախագահի պաշտոնի ամենառեալ թեկնածուն է: «Կառավարությունն առայժմ չի բերել բյուջեի վերջնական տարբերակը, իսկ ոչ ճշգրիտ թվեր քննարկելը իմաստ չունի»,- ասաց պրն Բոստանջյանը:
Ըստ պաշտոնական տվյալների, քննարկվելիք բյուջեի ճեղքվածքը կազմելու է 97 միլիարդ դրամ: Սակայն փորձագետների կարծիքով, այդ թիվն էլ վերջնական չէ եւ կարող է հասնել 100-110 միլիարդ դրամի, եթե մինչեւ տարեվերջ Արժույթի միջազգային հիմնադրամը եւ Համաշխարհային բանկը չտան ակնկալվելիք վարկերը, իսկ դրա հավանականությունը բավականին բարձր է:
Հիշեցնենք, որ 98-ի վերջին Արմեն Դարբինյանի կառավարությունը տարին փակեց, պաշտոնական տվյալներով, 3 միլիարդ դրամ պարտքով: Այնուհետեւ 99-ի ամռանը վարչապետ Վազգեն Սարգսյանը հայտարարեց 26 միլիարդ դրամ բյուջեի ճեղքվածքի մասին եւ առաջարկեց խորհրդարանին կրճատել ծախսային մասը: Ճեղքվածքի սրընթաց աճը փորձագետները բացատրում են երեք փոխկապակցված գործոններով. քաղաքական անկայունությամբ, ոչ էֆեկտիվ տնտեսական քաղաքականությամբ եւ նրանով, որ 1999-2000 թվականներին Հայաստանի բյուջեն եւ տնտեսության տարբեր ճյուղերը ՀԲ-ից եւ ԱՄՀ-ից չէին ստացել սպասվելիք $100-110 միլիոնը:
Ա. Ա.
