ԱԺ պատգամավոր Սերգեյ Իսրայելյանի կարծիքով՝ այն մարդը, որը դեմ է մարտի 8-ը տոնացույցում վերընդգրկելուն՝ «առնվազն պիտի իմպոտենտ լինի։ Մի մարդ, որը չի ուզում աղջկան ծաղիկ նվիրել, կնոջը՝ սիրել, այդ մարդու մոտ ուրեմն կլինիկա է»։ Սա արժանացավ Ֆիլարետ Բերիկյանի ընդվզումին. «Չպետք է մենք այնպիսի օրենք ընդունենք, որ կանանց սիրելու, ծաղիկ նվիրելու տարին մի օր ունենանք։ Ի՞նչ է, մենք զրկվա՞ծ ենք մնացած օրերին սիրելուց։ Շնորհակալությո՛ւն»։ Արշակ Սադոյանն էլ ուղղեց. «Ինչո՞ւ… տարին երկու անգամ կարելի է սիրել»։
ԽՆՁՈՐՈՎ ՍԵՔՍ
«Շարվեշարան կազմակերպություններ են հայտվում արտասահմանից, որոնք համառորեն ուզում են պլանավորել մեր ընտանիքները,- երեկ ըմբոստացավ կոմունիստ պատգամավոր Գագիկ Թադեւոսյանը։- Անպայման պլանավորման խնդիր են դնում եւ ցանկանում, որ 6-րդ դասարանից մեր երեխաներն ապահով սեքսով ապրեն»։ Իմպերիալիստական ապահովիչներին կոմունիստ պատգամավորը հակադրեց մեր ազգային ավանդույթները. «Ամենաապահովը մեր կարմիր խնձորի ավանդույթն է… Դրանից լավ ապահովիչ չկա»։
Կարդացեք նաև
ՆՈՐՈՅԻ ԶՐՈՒՅՑԸ
ԱԺ պատգամավոր Նորիկ Պետրոսյանը բարձր գնահատեց «մեր շատ հարգելի, կոմունիստների կողմից պաշտված ընկեր Քրիստոսի» ծառայությունները։ Քանզի «ընկեր սոցիալիստ Քրիստոսը» հավասարություն եւ եղբայրություն է մտցրել ազգերի եւ ժողովուրդների մեջ։ Մի վերապահում. դա վերաբերել է միայն տղամարդկանց, իսկ կանանց նա արգելել է եկեղեցի մտնել։ «Ընկեր սոցիալիստ Քրիստոսի» գործը շարունակել է «ընկեր սոցիալիստ Կլարա Ցետկինը»։ Թե՝ «ընկեր Քրիստոս-սոցիալիստ, գործը արել ես՝ կիսատ ես թողել, ախպեր ջան, գնա-հետ մնա՝ էդ գործը ես շարունակեմ։ Այն իրավունքը, հավասարությունը, որ տվել ես տղամարդկանց, հիմա արի համաձայնի, որ ունենան նաեւ կանայք»։
ԳԼԽԱՑԱՎԱՆՔ ԳԼԽԱՎՈՐ ԴԱՏԱԽԱԶԻ ՀԱՄԱՐ
«Ուսումնասիրվե՞լ են արդյոք հոկտեմբերի 27-ի գործով նախկին մեղադրյալ Նաիրի Բադալյանի ներկայացրած փաստերը Նուբարաշենի մեկուսարանում կիրառված բռնարարքների վերաբերյալ»,- «Առավոտի» այս հարցին ՆԳ նախարար Հայկ Հարությունյանը պատասխանեց. «Ծառայական քննությունը կատարվեց մանրակրկիտ։ Նաիրի Բադալյանի նշած որոշ փաստեր չհիմնավորվեցին։ Քանի որ հակասական նյութեր ստեղծվեցին, կային իրարամերժ բացատրություններ, ամբողջ նյութերն ուղարկեցինք գլխավոր դատախազին»։
