Նախկին վարչապետ Արամ Սարգսյանը հայտարարել է, որ մտադիր է մեծ քաղաքականություն մտնել։ Հավաստի աղբյուրներն ասում են, որ պարոն Սարգսյանը մտադիր է հանդես գալ ոչ թե որեւէ կուսակցության կազմում, այլ ստեղծել իր կուսակցությունը։ Թերեւս սրանով է պայմանավորված այն հանգամանքը, որ Ա.Սարգսյանը վերջին մի քանի օրերի ընթացքում ակտիվ շփումներ եւ հանդիպումներ է ունենում մտավորականների, քաղաքական գործիչների ու պետական պաշտոնյաների հետ։
ՏՂԱՄԱՐԴԻԿ՝ ՈՉԻՆՉ, ԿԱՆԱ՛ՅՔ ՉԵՆ ՍԻՐՈՒՄ
Զինդատախազ Գագիկ Ջհանգիրյանը խոստացավ «Առավոտի» բոլոր հարցերին պատասխանել հոկտեմբերի 27-ից հետո։ Իսկ մինչ այդ թերթի թղթակցուհուց հետաքրքրվեց, թե ինչո՞ւ իրեն չի սիրում եւ իր մասին միշտ վատ-վատ բաներ է գրում։ Վերջինս հիշեցրեց, թե իր չսիրելն՝ ի՞նչ, նրան անգամ վարչապետը չի սիրում։ Գագիկ Ջհանգիրյանը պատասխանեց. «Տղամարդկանց չսիրելուց չեմ վախենում, կանա՛նց չսիրելուց եմ վախենում»։
Կարդացեք նաև
ԱՐՄԱՏԸ ԶՆՆԵՔ
Իշխանափոխության վերաբերյալ Արկադի Վարդանյանի կոչերի առնչությամբ Արտաշես Գեղամյանը նկատեց, որ Հայաստանի ամեն մարզում դրանք բավական մեծ լսարան են գտել վերջին երկու ամսում. «Այդ կոչերը եթե անգամ հնչում են հանրության համար ոչ այնքան հայտնի մարդու կողմից՝ ոգեւորությամբ ընդունվում են։ Փոխանակ իշխանությունները մտածեն, թե ի՞նչն է պատճառը, որ անկախ նրանից՝ ում կողմից է արտահայտվում, ազգաբնակչության մեջ այդքան մեծ ոգեւորություն են առաջացնում այդ կոչերը՝ այդ մարդու կենսագրականն են վերլուծում»։
