ՎԻՃԱԿԻ ՊԱՏԱՍԽԱՆԱՏՈՒՆԵՐԸ «Առավոտի» հարցին ի պատասխան, թե իրենց ուսումնասիրություններով կա՞ն բավարար հիմքեր, որ կարելի լինի պնդել էներգետիկ չարաշահումներին հանրապետության նախկին ղեկավարների առնչակցության մասին, քննչական խմբի ղեկավար Հեկտոր Սարդարյանն ասաց. «Այս հարցի պատասխանը, եթե անկեղծ լինեմ, հետեւյալն է. հանրապետությունում եթե ստեղծվում է այնպիսի վիճակ, ինչ որ ստեղծվել էր 1992-95թթ. ընթացքում, արդեն այդ վիճակի՛ համար, ընդհանուր առմամբ, պատասխանատու են հանրապետության ղեկավար պաշտոնատար անձինք։ Բայց որպեսզի կրիմինալ առումով նրանք պատասխանատու կոչվեն, առավել եւս, դառնան մեղադրյալներ՝ դրա համար շատ ու շատ բաներ են պետք։ Հաշվի առեք, մենք չենք կարող ենթադրությամբ մարդկանց մեղադրել, նույնիսկ անունները տալ չի կարելի»։ ՎԱՐԿԱԾ «Առավոտի» խնդրանքով մեկնաբանելով Աշոտ Մանուչարյանի հայտարարությունները՝ վարչապետ Անդրանիկ Մարգարյանն ասաց, թե Մեղրիի փոխանակման վերաբերյալ ՀՀԿ-ն մտահոգություններ ուներ դեռ անցած տարվա նոյեմբերին եւ անընդունելի էր համարում այդ տարբերակը քննարկելն անգամ. «Իսկ ինչ վերաբերում է Մանուչարյանի հայտարարությանը, թե որոշակի կապ կարող է լինել Մեղրիի տարբերակի եւ 27-ի դեպքերի միջեւ՝ դա մի վարկած է, որ քննչական խումբը պետք է քննարկեր։ Չգիտեմ, տեղյակ չեմ՝ քննարկել, մերժել են, թե՞…»։ ՆՈՐ Ե՞րբ եւ ո՞ր գործիչն է պատմել. «Դեպքից րոպեներ անց Մադաթյան Էդիկի հետ մոտեցանք այդ տղաներին, փորձեցինք ճշտել նրանց պահանջները։ Ես, օրինակ, անգամ առաջարկեցի՝ գուցե ուղղաթիռով գնանք Ղարաբաղ ու նորից հե՞տ գանք… Նաիրի Հունանյանը ոտքից գլուխ չափեց մեզ, թե «Կարող ա՞ ինձ Դուդաեւի տեղն ես դնում»։ ՆԱԽՈՐԴ Այս անգամ բազմաթիվ էին ճիշտ պատասխանները, բայց առաջինը Տեղեկատվության եւ գրահրատարակչության վարչության նախկին պետի տեղակալ Արայիկ Մանուկյանն էր, որ հիշեց, թե 1990-ին իր «Էս ի՞նչ ենք անում, տղե՛րք» հրապարակախոսական հոդվածում Վազգեն Սարգսյանն էր գրել. «Ուտող-խմողներն ու սեւ մեքենաներով պտտվողնե՞րը… է, միշտ էլ, բոլոր ժամանակներում էլ այդպես է եղել, յուրաքանչյուր ազգ ունեցել է իր համար արյուն թափողներ եւ արյուն ծծողներ, ու էն ազգերն են գոյատեւել, ում համար արյուն չխնայողները բազում են եղել։ Եվ եթե այսօր, այնուամենայնիվ, մենք ենք արյուն չխնայողները, բերեք մեր խաչը սուսուփուս, արժանապատվորեն տանենք: Ամեն ինչ խառնվել է իրար, երրորդ դասարանի կրթությամբ որեւէ դուրսպրծուկ մեկ ավտոմատով ու չորս դանակով կարող է ազգի ճակատագրի հետ կատակներ անել»:
