Ռուսաստանի եւ Նոր Նախիջեւանի թեմի նախկին առաջնորդ Տիրան արքեպիսկոպոս Կյուրեղյանն «Ազատություն» ռ/կ-ին տված հարցազրույցում իր պաշտոնանկության մեղքը վերագրել է ՌԴ-ում Հայաստանի դեսպան Սուրեն Սահակյանին. «Ցավոք սրտի, որոշ մարդիկ, որոնք եկան դեսպան եւ իր կողքի մարդիկ՝ հրահրել են այս ընդվզումը։ (…) Շատ բացասական դեր է խաղացել այս ամբողջ տարվա ընթացքում՝ քայքայելով մեր համայնքը»։
Ո՞Ր ԱՇԽԱՐՀՈՒՄ՝ Է՞Ս, ԹԵ՞ ԷՆ
Ըստ ոչ պաշտոնական աղբյուրների՝ չի բացառվում, որ ԱԺ նախագահ Արմեն Խաչատրյանը «արտագաղթի» Հայաստանից՝ իր նախընտրած երկրում դեսպան աշխատելու համար։ Ենթադրում ենք, որ նրա պերմանենտ շրջագայությունները զուտ ճանաչողական բնույթ էին կրում եւ նրան կօգնեն երկիր ընտրելիս ճիշտ կողմնորոշվել։
Կարդացեք նաև
ԱՐՏԱԳԱՂԹԻ ՑՈՒՑԱՆԻՇ
«Առավոտի» ընթերցողներից մեկը, որ պատրաստվում էր բուժման մեկնել ԱՄՆ, պատմեց, թե որեւէ կերպ չի կարողանում 5 դոլարանոցներ գտնել եւ դրանք դեֆիցիտ են դարձել անգամ «Երեւան» կինոթատրոնի հարակից «չեյնջերի» փողոցում։ Բանն այն է, որ երկու 5 դոլարանոց է հարկավոր մուծել ԱՄՆ հյուպատոսարանից մուտքի արտոնություն ստանալու համար։
ՇՆՈՐՀԱՎՈՐ
Երեկ ՆԳ նախարար Հայկ Հարությունյանի ծննդյան օրն էր, որի առթիվ Երեւանում տեղի է ունեցել հրավառություն՝ երկու համազարկ։ Միանում ենք ջերմ շնորհավորանքին։
