Թերթերից մեկում ՍԻՄ նախագահ Հրանտ Խաչատրյանը հայտարարել էր, որ ՍԻՄ խմբակցությունը շարունակելու է չմասնակցել ԱԺ նիստերին, մինչեւ խորհրդարանում վիճակը չկարգավորվի։ Մեր խնդրանքին՝ առավել մանրամասնել՝ ինչպե՞ս է պրն Խաչատրյանը պատկերացնում վիճակի կարգավորումը, ՍԻՄ նախագահը պատասխանեց. «Պետք է պարզվի քաղաքական ուժերի դիրքորոշումը։ Կոնկրետ ինձ համար այնքան էլ հասկանալի չէ ՍԴ որոշումը. գուցե ՍԴ-ն իր որոշմամբ նախապատրաստում է ԱԺ-ի հաջո՞րդ ճգնաժամը»։
ՄԻ՛ ԳՆԱ ԼՍՈՒՄՆԵՐԻ
Արագածոտնի մարզպետ Հրայր Կարապետյանը երեկ ԱԺ-ի ամբիոնից ունեցած իր ելույթում պատմեց, թե առաջին անգամ, երբ մասնակցել է աղետի գոտու վերաբերյալ պետաիրավական հանձնաժողովի կազմակերպած լսումներին՝ կրճատել են իր մարզի Ծաղկահովիտ գյուղի կապիտալ շինարարության համար գումարները։ Երկրորդ անգամ մասնակցել է երաշտի վերաբերյալ լսումներին եւ, ի տարբերություն բոլոր այլ մարզերի՝ Արագածոտնը սերմացու չի ստացել։ Երեկ պրն Կարապետյանը մասնակցելով վարչատարածքային բաժանման մասին լսումներին՝ պարզել էր, որ Արագածոտնի մարզպետարանն ընդհանրապես լիկվիդացվելու է… Իրոք, այդ լսումների հիմնական զեկուցողի առաջարկի համաձայն՝ պիտի մնան միայն Սյունիք, Գեղարքունիք, Լոռի, Փամբակ եւ Շիրակ մարզերը։
Կարդացեք նաև
ԱՐՄԵՆ՝ ՆԱԽԱԳԱՀ
ՀԺԿ անդամներից մեկը մեր հարցին, թե ինչպես են պատրաստվում ազատվել Արմեն Խաչատրյանից, պատասխանեց. «Արմենից պրծում չկա։ Այսպես որ շարունակվի, նա երկրի նախագահ էլ կդառնա»։ Ամենեւին չենք զարմանա, քանի որ Քաջ Նազարի մասին հեքիաթը տիպիկ հայկական արմատներ ունի։
