«Առավոտի» հարցին, թե ի՞նչ հարաբերություններ ուներ ԱԱՆ մեկուսարանում իր հետ նույն խցում նստածների հետ, նախագահի արտաքին քաղաքական հարցերով խորհրդական, հոկտեմբերի 27-ի գործով նախկին մեղադրյալ Ալեքսան Հարությունյանը պատասխանեց. «Խցակիցներս, բացի մեկ-երկուսից, բոլորն անտաղանդ գործակալներ էին։ Եվ նրանց հետ շփումներ, բնականաբար, գրեթե չկային»։
Ալեքսան Հարությունյանի հետ հարցազրույցը՝ վաղվա համարում։
ՃՈՅՏԱՏԻՐԱԿԱՆ ՆԻՍՏՈՒԿԱՑ
Կարդացեք նաև
Էջմիածնում տարածված լուրերի համաձայն, ԱԺ պատգամավոր Հակոբ Հակոբյանը ծեծել է տեղի ոստիկանապետին։ Վստահ ենք, որ այս հրապարակումից հետո նրանք երկուսով կհայտնվեն «Առավոտում» ու կերդվեն, որ միշտ հարգել ու սիրել են միմյանց։
ՄԱՆՐԱԽՆԴԻՐ
Չնայած քաղաքապետարանի կրթության վարչության պետ Սիլվա Խրիմյանը դեռեւս հրամանով ազատված չէ աշխատանքից, բայց այդ մասին Ալբերտ Բազեյանի մտադրությունների հրապարակման հաջորդ օրն իսկ Սիլվա Խրիմյանի վարորդից պահանջել են ծառայողական մեքենայի բանալիները։ Ի դեպ, հայտնի չէ, թե կրթության վարչության պետի պաշտոնակատար նշանակված Աշոտ Ափիկյանն ի՞նչ առնչություն է ունեցել դպրոցական համակարգին։ Խոսվում է միայն այն մասին, որ նա նախկին քաղբանտարկյալ է։
ԳԱՂՏՆԻ ՀԱՆԴԻՊՈՒՄ ՉԷՐ
«Առավոտին» հաջողվեց ճշտել, թե Հայաստանում Ֆրանսիայի նախկին դեսպան տիկին դը Հարթինգը Ռոբերտ Քոչարյանի հետ հանդիպել էր ոչ թե հոկտեմբերի 27-ի նախորդ օրը, այլ հենց հոկտեմբերի 27-ին եւ նույն ժամին, երբ ԱԺ-ում ծավալվում էին ողբերգական իրադարձությունները։ Նախագահին այդ հանդիպումից դուրս կանչելով էին հայտնել կատարվածի մասին։ Դը Հարթինգի հետ պաշտոնական հանդիպումը, սովորականի պես, նկարահանել էին բազմաթիվ հեռուստաընկերությունների ներկայացուցիչներ, բայց, հասկանալի պատճառներով, չցուցադրեցին։
