Սույն թվականի հունվարի 10-ից շարունակվում է «Նոր ուղի» քաղաքական կուսակցության առաջնորդ, «Մխիթար Սեբաստացի» կրթահամալիրի տնօրեն Աշոտ Բլեյանի դատավարությունը։ Հելսինկյան ընկերակցությունը բազմիցս հասարակության ուշադրությանն է ներկայացրել դատավարության պատվիրված բնույթը, որտեղ տնտեսական հանցագործությունների եւ պաշտոնական դիրքի չարաշահման մտացածին մեղադրանքների քողի տակ հանրապետության ներկայիս իշխանությունները հաշիվ են մաքրում իրենց քաղաքական հակառակորդից։
Ա. Բլեյանի դատավարությունը մեկ անգամ եւս ապացուցում է Հայաստանի արդարադատության համակարգի անբարոյական էությունը, իսկ դատավոր Իսկուհի Վարդանյանի գործողությունները հաստատում են մեր հայտարարությունների ճշմարտացիությունը՝ հանրապետությունում առկա կոռուպցիայի եւ անկախ դատավորների բացակայության մասին։ Ողջ դատավարության ընթացքում մեկ անգամ չէ, որ արձանագրվել են օրենքների, Հայաստանի Սահմանադրության, ինչպես նաեւ հանրապետության իշխանությունների ստորագրած միջազգային փաստաթղթերի կոպիտ խախտումներ։ Դրանց բարձրագույն կետը եղավ այն, որ վերջին դատավարական վիճաբանությունների ժամանակ Երեւան քաղաքի դատախազության ներկայացուցիչները մեղադրականը ընթերցեցին դատարկ դահլիճում, անգամ առանց ամբաստանյալի ներկայության։ Իսկ մեղադրյալներին եւ դատավարությանը հետեւողներին ահաբեկելու նպատակով գործի էին դրվել ՆԳՆ զինված ջոկատները։ Հելսինկյան ընկերակցությունը հայտարարում է, որ Ա. Բլեյանի դատավարությունը քաղաքական է, որտեղ պատվիրատուների դերը միանշանակ ստանձնել են իշխանությունները, մասնավորապես նախագահը, որը համարվում է Հայաստանի Հանրապետության օրինականության երաշխիքը։
Հելսինկյան ընկերակցությունը դիմում է բարի կամքի տեր բոլոր մարդկանց, միջազգային կազմակերպություններին, ամբողջ աշխարհի ժողովրդավարական ուժերին՝ դադարեցնել իրավական կամայականությունը Հայաստանում։
Հելսինկյան ընկերակցություն
Կարդացեք նաև
12.10.2000թ.
ՎՐԱՍՏԱՆԸ ԴԺԳՈՀ Է ԲԻՇՔԵԿՅԱՆ ՈՐՈՇՈՒՄՆԵՐԻՑ
Հոկտեմբերի 11-ին ԱՊՀ Հավաքական անվտանգության պայմանագրի մասնակից վեց պետությունների կողմից ընդունված որոշումը՝ համատեղ զինվորական ստորաբաժանումների ստեղծման վերաբերյալ, կարող է հանգեցնել հավասարակշռության խախտմանը Կովկասում: Այս մասին հայտարարել է Վրաստանի Պետկանցելյարիայի միջազգային հարցերով ծառայության ղեկավարի տեղակալ Շալվա Պիչխաձեն: Նա հայտարարել է, որ Հավաքական անվտանգության պայմանագրի լիազորությունների նման ընդլայնումը Ռուսաստանին այլեւս թույլ չի տա օբյեկտիվորեն մոտենալ ղարաբաղյան խնդրի կարգավորմանը, «քանի որ «Բիշքեկյան վեցյակում» ընդգրկված է Հայաստանը եւ բացակայում է Ադրբեջանը:
Պիչխաձեն մտավախություն է հայտնել, որ, այսպիսով, Ռուսաստանը կարող է ներքաշվել ռազմական հակամարտության մեջ ԱՊՀ երկու անդամների միջեւ: Խոսելով այն մասին, կընդունե՞ն արդյոք ՎՈՒՈՒԱՄ-ի անդամ պետությունները ավելի սերտ ռազմական համագործակցության մասին որոշում, թե՝ ոչ, Պիչխաձեն ասել է, որ ՎՈՒՈՒԱՄ-ը ռազմական դաշինքի վերածելու ծրագրեր առայժմ չեն մշակվում, սակայն Ռուսաստանի հրաժարվելը ԱՊՀ-ում ոչ վիզային կանոնակարգից կարող է ՎՈՒՈՒԱՄ-ին դրդել ավելի սերտ ինտեգրացման:
ՄԵԴԻԱՄԱՔՍ
ԾԻԾԱՂԱՇԱՐԺ ԱԹՈՌԱԿՌԻՎ
ԱԺՄ խմբակցության անդամ Արշակ Սադոյանի անձնական կարծիքով, խորհրդարանում «ծիծաղաշարժ աթոռակռիվ է, ծիծաղելի է ժողովրդի քվե չստացած մեծամասնություն ստեղծելը»։
Սեփ. լր.
